Ap sa ka HSPDP ban kylla long kum ka Congress
Shillong Kyllalyngkot 05: Sa lai ngut ki MLA kila ai ia ka shithi iehnohkam hynne ka sngi palei, kaba pynsah mynta satang 50 ngut ki Dkhot ka Iingdorbar Meghalaya Assembly na ka 60 ngut baroh lang.
Kine ki lai ngut ki kynthup ia 2 ngut ki MLA ka Peoples Democratic Front (PDF) kaba don 4 ngut ki MLA, bad uwei u MLA ka HSPDP.
Ki MLA ka PDF ki dei u MLA ka Mylliem Bah Hamletson Dohling uba bat ia ka shuki Myntri ha ka Sorkar Meghalaya Democratic Alliance (MDA) ba ialam da ka NPP bad u MLA ka Umsning Bah Jason Sawkmie Mawlong.
Kine baroh arngut ki MLA kila aiti ruh ia ka shithi iehnohkam kum ki dkhot ka PDF ban plie lynti ia ka jingleit iasoh sha ka NPP, bad ban long ki kyrtong jong kane ka seng sain pyrthei ha ka elekshon MLA 2023.
U MLA ka HSPDP u dei u Bah Samlin Malngiang uba mihkhmat ia ka Sohiong Constituency bad u dei ruh u Myntri barim ha ka Sorkar MDA ba ialam da ka NPP. Une u MLA ruh ula mih noh na ka seng HSPDP ban leit iasoh sha ka NPP bad long u kyrtong ka party ha ka elekshon MLA-2023.
Kine ki laingut ki MLA kila leit aiti ia ka shithi iehnoh ia ka jinglong Nongthawain hakhmat u Lamphang ka Iingdorbar Bah Metbah Lyngdoh, ha ka jingiadonlang ki nongkyrshan bad ki nongialam ba hakhmat jong ki.
Ka HSPDP kaba don tang arngut ki MLA, kala ap mynta ban kylla long kum ka Congress ka bym don MLA shuh ki ban mih aireng ha ka elekshon MLA-2023. Nalor u bah Samlin, u MLA ka Mawkyrwat Bah Renikton L Tongkhar u lah ban mihnoh na kane ka seng bad leit pyniasoh ialade sha ka UDP.
Kumba long mynta, haduh 10 ngut ki MLA ba mynta kila iehnoh ia ka jinglong nongmihkhmat sha ka Iingdorbar Thaw Ain kynthup ia kine ki 3 ngut ba dang shu iehnohkam hynne ka sngi.
Ki 7 ngut kiwei pat ki dei i kong Ampareen Lyngdoh (East Shillong), Mohendro Rapsang (West Shillong), Kimfa S Marbaniang (Rambrai-Jyrngam), Himalaya Shangpliang (Mawsynram), Ferlin CA Sangma (Selsella), Benedic Marak (Raksamgre) bad u SG Estamur Mominin (Phulbari).
