Agartala, K’Lyngkot 05: U Myntri kam pohiing ka sorkar pdeng u Amit Shah hynne ka sngi ula ong ba ka BJP kan ioh ban thaw biang ia ka sorkar ha ka sien kaba ar ha Tripura.
Haba iashim bynta ha ka jinglehniam ‘Jan Vishwas Yatra’ ha North Tripura mynta ka sngi, u Amit Shah ula ong ba ka BJP ka la ai ia ka jingsynshar kaba bha tam ha Tripura ha kine ki san snem kiba la leit noh bad sa shisien pat kan bteng ia ka jingsynshar ha ka kylla kaba ar, kata ha kaba ka BJP kan thaw ia ka sorkar.
“Ka jingwan iashim bynta jong kiba bun ki paidbah ha kane ka rally ka pyni ba ki paidbah ki don ka jingshaniah ha ka BJP bad ka pyni ruh kumno ba ka party kan wanphai biang ha ka bor bad ioh ia ka jingbun paid hadien kane ka ilekshon assembly ka ban wan.Ha kine ki san snem ba la dep ka BJP kala trei borbah na ka bynta ka bha ka miat jong ki paidbah ka jylla,” ong u Shah.
Haba kynthoh ia ka liang pyrshah Congress bad Communist, u Shah ula ong baroh kine ki artylli ki party kila poi sha kaba kut.
U Shah ula ong ruh ba u OM Modi ula buh ia ki mawnongrim na ka bynta ka roi ka par ha baroh ki bynta jong ka ri, hynrei ka Congress bad ka Communist kila iehnoh shadien ia ka Tripura.
“Ki paidbah kila ngiah ia ka Congress bad Communist.Ka Congress kala poi sha kaba kut hapoh ka ri bad ka Communist kala kut noh ha ka pyrthei.Ka BJP kan ioh ia ka jingjop kaba donburom ha kane ka jylla sa shisien pat,” ong shuh shuh utei u myntri ka sorkar pdeng.
Nalor kata u Shah ula ong ba kane ka jingiaid leh niam ‘Ratha Yatra’kan jam palat 1000 km bad wanrah ka jingiatylli hapdeng ki paidbah. “Ngi don ka jingkyrmen kaba skhem ba ka BJP kan wanphai biang ha ka bor bad ioh ia ka jingbun paidbah kaba haduh ar bad laishah mynta u snem,” ong u Shah.
Da kaba kynthoh tyngeh ia ka sorkar communist barim namar ka jingpynlong ia ka sorkar kum ka kynhun pyntriem, u Shah ula ong ba ha ka por ka jingsynsahr communist kim shym la don kino kino ki kam pynroi ha Tripura, hynrei ha kine ki san snem ba la dep ka BJP kala lah ban wanrah ia kiba bun bah ki kam pynroi ha Tripura.
