Guwahati, K’Lyngkot 05 :Ka liengsuin kaba kit ia u Myntri kam pohiing ka sorkar pdeng u Amit Shah hynnin ka sngi Balang ka la hap ban phai bad hiar khyndew noh sha Guwahati, Assam hadien ba ka jingrben lyoh kala khanglad ia ka liengsuin ba kan iaid shakhmat shuh shuh ban poi shapoh Maharaja Bir Bikram Airport ha Agartala, Tripura.
U Amit Shah ula dei ban wan poi ha Tripura hadien ba ka sorkar synshar BJP kala pynkhreh ha kaba iadei bad ka jingpynlong ia ka ilekshon assembly.
Katkum ki tyllong khubor ka ATC la ong ba kane ka liengsuin kala hap ban hiar khyndew noh hadien ba kala hap ban phai noh shapoh Lokpriya Gopinath Bordoloi International Airport ha Guwahati.
U Amit Shah ula dei ban poi hynnin ka miet sngi Balang ha Agartala na ka bynta ban plie ia ka jinglehniam Rath Yatra na ka bynta ka jingpynkhreh ia ka ilekshon assembly ha Tripura ha ka sngi kaba bud, kata mynta ka 5 tarik Kyllalyngkot na Dharmanagar, hynrei la khmih lynti ba un mih mynta ka sngi ban leit sha Tripura.
Lyngba ka Twitter u Myntri Rangbah (CM) ka Assam u Himanta Biswa Sarma ula ong; “Kalong ka burom kaba khraw ban pdiang sngewbha ia u Myntri ka sorkar pdeng u Amit Shah hapoh LGBI Airport, Guwahati shwa ka jingleit jngoh ka jong u sha Tripura ha ka sngi kaba bud.
Ha kane ka jingleit kaba shi sngi kynthih sha Tripura, u Amit Shah un plie ia ki artylli ki jinglehniam Rath Yatra jong ka BJP ha ka jylla.Nalor kata u lah ruh ban leit nyngkong sha Dharmanagar ha North Tripura, kata kumba 190 km na ka nongbah Agartala na ka bynta ban plie ia ka jingleh niam.Hadien un leit sha Sabroom ha South Tripura, kata hajan khappud bad ka Bangladesh ban plie sa ia kawei pat ka jingleh niam.
Ha ka 2 tarik mynta u bnai na ka liang u Myntri Rangbah ka Tripura u Manik Saha ha ryngkat ka jingiadon lang u Myntri ka tnat Information & Cultural Affairs u Sushanta Chowdhury, ki la pynlong ka jingleit jurip sha Dharmanagar bad Sabroom ha kaba iadei bad ki jingpynkhreh na ka bynta ka jingialang paidbah kaba heh jong ka party shwa ka jingpynlong ia ka ilekshon assembly ha u bnai Rymphang u ban wan.
Shibun tylli ki jingialang paidbah bad ki jingiaid paidbah la pynkhreh shibynta jong ka jinglehniam Rath Yatra.
