Siang, K’Lyngkot 3: U Myntri iada ri ka Ri u Rajnath Singh hynne ka sngi ula plie paidbah iaka jingkieng Siyom hapoh ka district Siang jong ka jylla Arunachal Pradesh.
Nalor ka Siyom Bridge, ha kane ka sngi u Rajnath Singh ula plie paidbah ruh haduh 27 tylli kiwei ki jingtei kam pynroi hapoh Arunachal Pradesh.
Lah ban kdew ba kane kadei ka sien ba nyngkong ba u myntri ka tnat iada ri u Rajnath Singh ula wan iuh kjat hapoh ka jylla hadien ba la mih ka jingiakynad hapeng ki shipai India bad ki shipai China ha Tawang.
U myntri ka tnat iada ri u Rajnath Singh ha kane ka sngi ula plie paidbah haduh 28 tylli ki project ia kiba la tei ha ka jinglut kumba T. 724.3.
Ka jingkieng Siyom Bridge ka don ka jingjrong kumba 100 mt bad kane ka jingkieng ka long ka ba kongsan naka bynta ki shipai India khamtam haba iadei bad ka thain Line of Actual Control (LAC) bad ha kane ka sngi u myntri sorkar pdeng ula plie ruh iaka Basti Bridge, Bhaironghati-Nelong Road bad ka Thangu Bridge.
Haba iadei bad kine ki jingtei kam pynroi naka liang u myntri ka tnat iada ri ula pyntip ba naka liang ki shipai India kila lah ban khanglad iaki shipai People’s Liberation Army (PLA) jong ka China ban kyntur pud ha u pud u sam ka India.
“Ha ka 9 tarik Nohprah 2022, ki shipai PLA kila pyrshang ban kyntur pud ha ki thain LAC ka ba don ha Yangtse jong ka Tawang sector hynrei naka liang ki shipai India kila khanglad bad kane ka long la jingjop iaka ri” la ong u Rajnath
