Imphal, Nohprah 22: U Director ka tnat pule puthi ka sorkar Manipur u L Nandakumar Singh lyngba ka memorandum ba la pyllait da ka ophis ka la khang pyrshah ha kaba iadei bad kino kino ki kam leit shangkai snhewbha na ki skul tad haduh ka 10 tarik u bnai Kyllalyngkot 2023.
Katkum ka memorandum la hukum ia baroh ki principal, ki headmaster bad headmistres jong baroh ki skul sorkar, ki skul kiba ioh jingiarap na ka sorkar kumjuh ia ki skul shimet ki bym ioh jingkyrshan ha ka jylla ba mardor kin ym pynlong ia kino kino ki jingleit shangkai na ki skul khnang ban khanglad na kino kino ki jingjia ba sngewsih.
Nalor kata la hukum ruh ia baroh ki khlieh jong ki skul ba kin bud ryntih ia kane ka jingbthah bad lada don kiba leh pyrshah ki principal, headmaster bad ki headmistres kin shim ia ka jingkitkhlieh lada jia kino kino ki jingjia ba sngewsih.
Haduh kumba 7 ngut ki khynnah skul ki la duh ei la ka jingim hadien ba kawei napdeng ki artylli ki bus ka la kylla khongpong ha ka lynti surok ha Noney District ha ka sngi Balang ba la lah. Ha kane ka jingjia ki la don bun ngut kiwei pat kiba la ngat ha ki jingmymsaw bad kiba don mynta hapdeng ka jingshah sumar ha ki hospital ka jylla.
Kitei ki artylli ki bus kiba kit ia ki khynnah skul jong ka skul Thambalnu Higher Secondary School, Yaripok, ki dang don ha ka lynti na ka bynta ka ‘study tour’ hadien ba katei ka jingjia ba sngewsih ka la wan jia.
Haba kren sha ki lad pathai khubor halor katei ka jingjia, na ka liang u nongialam shnong Longsai u Kabidon Gonmei ula ong ba kane ka jingjia ba sngewsih ka la jia ha ka ja ka kaba just ngat khah khah h ki jingjia tyngkhuh kali.
Ula kynnoh ruh ba ka daw ba kongsan halor kiba kum kine ki jingjia ba sngewsih ka dei namar ka jingleh matlab jong ka sorkar kaba la pul ban maramot ia katei ka surok wat hadien ba ki la iai kyrpad.
Na ka liang u CM ka Manipur u N Biren Singh ha ka 21 tarik mynta u bnai ula pynbna ia ka jingiarap pisa kaba mar. 5 lak tymgka sha kiba haiing hasem jong kiba la khlad noh ha katei ka jingjia ha Noney district.
Nalor kata u CM Biren. Singh ula pynbna ruh ia ka jingiarap kaba mar 1lak tyngka sha koto kiba mynsaw jur bad 50 hajar sha kiba mynsaw malu mala.
U CM ula kyntu ruh ia ki bor pyniaid jong ki hospital ba kin ai ia ka jingsumar kaba biang tam bad ia ki jinglut jingsep baroh ym bei da ka sorkar.
