Nongpoh, Nohprah 18: Ka seng Hynñiewtrep Integrated Territorial Organisation, Ri-Bhoi District, kala dawa naka sorkar ba ka dei ban pynkynriah kam noh mardor ïa u BDO ka Umsning C&RD Block bad kiwei kiwei ki ophisar kiba la trei palat ïaka 3 snem ban pyntreikam ruh ïaka hukum jong ka Election Commission of India (ECI).
U Bah Apbor Nongrum Working President ka HITO ha Ri-Bhoi, u la ong ba ka seng kala dep ban phah da ka jingthoh sha u Chief Secretary, CEO, bad kumjuh ruh sha u Myntri ka tnad C&RD Block Bah Hamlet Dohling ban pynkynriah kam noh ïa u Raja Brahma, BDO ka Umsning C&RD Block u ba la trei mynta la kumba 5 snem ha katei ka Block.
U ong ba katkum ka jingbthah jong ka ECI bad kumjuh ruh ka Service Rule la kren shai ba uno uno u ophisar u ba la trei palat ïaka 3 snem ha kajuh ka jaka u dei ban shah pynkynriah kam noh khnang ba ka kam kan long kaba khuid ba suba.
U la ong ruh ba ka sorkar ka dei ban ailad ruh ïa kiwei ki ophisar khynnah ba kin ioh ba shim bynta kum ki BDO ha Umsning, namar kumba la kynnoh da ka seng u tei u BDO ba trei mynta la kumba 5 snem ha Umsning Block u don ruh ka jingthmu ban pynkynriah noh ïaka Umsning C&RD Block sha Lad Umpih naka jaka kaba don 10 akar sha ka jaka kaba don tang kumba 2 akar.
Ula ong ba kane la pynsuba sniew ïaka seng ba ka lah ban don kaei kaei sha lyndet halor ka jingthmu ban pynkynriah ïaka ophis treikam jong ka Block kaba lah ruh ban buh jingeh ïaki paidbah ba bun ba lang.
Ka seng ka dawa naka sorkar ba kadei ban shimkhia ban pynkynriah lut ïa baroh ki ophisar bala trei palat ïaka 3 snem naka bynta ka jingkhuid jingsuba bad lada ka jingpynkynriah kam ka noh shilliang naka liang ka seng kam banse ban shim da kiwei ki lad ki lynti kiba tyngeh.
