Nongstoiñ, Nohprah 18: Ka National Federation of New State (MFNS) ka la aiti ia ka dorkhas sha u Myntri kam Pohiing ka Ri u Amit Shah, ba dawa ban pynkha ia ki Jylla Thymmai ki ban phiah na ki Jylla bapher bapher ka Ri.
Ka NFNS kala leit ban aiti ia kane ka dorkhas hadien ka jingpynkut ia ka jingiakhih ba long ha Jantarmantar, New Delhi myn ha ka 15 tarik Nohprah.
Ki Kynhun kiba la iashimbynta ha ka jingiakhih ki kynthup ia ka GSMC, HSPDP kiba dei na Meghalaya kiba dawa phiah ia ka Meghalaya sha ka Khasi Jaintia State bad Garoland, ka Bodo land, Gurkha land, Tripra Land, Kuki state, Budelkhand, Purbanchal hapoh ka jingїalam jong u Professor Munish Tamang kum u President, ki nongialam ki la їoh ruh ban aiti їa ka memorandum sha u Amit Shah Myntri kam pohїing ka ri.
Ha katei ka dorkhas ba la їasoi lang da ki hynñiew ngut ki nongїalam, kata u Professor Munsih Tamang President, Nikman Marak Vice President StalynIngti Secretary, Bah K.P.Pangñiang President HSPDP, Khrishna Kanta Jamatia Vice president IPFT, Khupbailu Vice President Kuki State Demand Committee, Khersingh Teron Chairman JACAS, ka NFNS, ka la kdew shai ba ka jingdawa їa ki jylla ba thymmai, ka long katkum ki mat ba la kdew ha ka riti synshar ka ri,
La kdew shai ruh ba katei ka jingdawa kam dei shuh kaba dang thymmai, hynrei ka dei ka jingdawa kaba la slem bha kaba la pynshong nongrim kat kum ka riti synshar ka ri. Nalor kata la pynkynmaw ruh sha ka sorkar India ba ka jingthaw їa ki jylla ba thymmai, ka long katkum ka ktien ka thylliej bad ki jaitbynriew kiba shnong ha kitei ki jaka kan їarap shibun ban kyntiew bad pynkhlaiñ shuh shuh їa ka synshar paitbah ha ka ri.
Ka NFNS ka la pynkynmaw ba ka sorkar India ka la kular la bunsien ba kan pynurlong їa katei ka jingdawa bad mynta ka NFNS ka angnud ba ka sorkar India ka dei ban pynurlong noh kloi katba lah.
