Shillong, Nohprah 18 : U Myntri Rangbah Duh ka Ri Narendra Modi hynne ka sngi U Blei ula batai ia ka jingdonkam jong ki 8 tylli ki paia na ka bynta ka roi ka par jong ka Thain Shatei Lam Mingi haba niew ruh ia ki phra tylli ki Jylla ka thain kum ka “Ashta Lakshmi”.
Haba kren ha ka jingialang jong ka North Easteren Council (NEC) ha Madan Polo ban rakhe ia ka jingdap 50 snem jong ka Council, u Myntri Rangbah Duh ula niew ia ki Jylla jong kane ka thain kum ka “Ashta Lakshmi”, ne ki phra tylli ki matti jong ka Blei Lakshmi, ka Blei Hindu jong ka roi ka par.
Ula ong ba ki Sorkar ki dei ban trei halor ki phra tylli ki paia ba kin kiew shaphrang kiba kynthup ia ka jingsuk, ka bording, ka kam jngohkai, ka 5G Connection, ka Culture, ka Rep tynrai, ki kam ialehkai bad ka spah ba ka don ha sawdong.
Haba iaroh ia ka synniang jong ka NEC sha ka roi ka par jong ka thain Shatei Lam Mihngi, kaba la sdang treikam naduh u snem 1972, u Myntri Rangbah ula ong ba kane ka jingrakhe dap 50 snem ka NEC ka la hap lang ruh hapoh ka jingrakhe jong ka Ri ia ka Azadi ka Amrit Mohatsav.
Haba ban jur ia ka jingkongsan jong ka thain Shatei Lam Mihngi, u Modi ula ong “Ka Thain ka dei ka khyrdop sha ki Ri ka South-East Asia bad ka long ban long ka jaka pdeng jong ka roi ka par ha ka thain baroh kawei”. Ula ong, ban pynurlong ia kane ka lad, ka Sorkar kala pyntrei ia ka project kum ka India-Myanmar-Thalang Trilateral Highway bad ruh ia ka Agartala-Akhaura Rail Profect.
U Modi ula pynpaw ruh ba ka Sorkar kala jam palat ban pynkylla ia ka ‘Look East’ Policy sha ka ‘Act East’, bad mynta kane ka Policy ka dei “Act East for North East” bad “Act First for Northeast”.
Haba kdeew ia ka jingjop ha kaban wanrah ia ka jingsuk hapoh ka thain, u Modi ula ong ba ka Sorkar Pdeng kala iasoi ia shibun ki soskular iasuk, ka jingpynbeit ia u pud u sam jong ki Jylla ruh kala leh bad kala duna bha ha ka jingdon ki kam pyntriem jong ki kynhun kiengatiar.
Haba kdew halor ka jingkut jingmut ka Ri India ban long ka Ri ba pahuh bording, u Myntri Rangbah ula ong ba ka thain Shatei Lam Mihngi ka lah ban long ka powerhouse jong ka hudropower. Kane kan pynlong ia ki Jylla kiba pahuh ia ka bording, iarap ban pynbun ia ki karkhana bad lah ban kyntiew ruh shibun bah ha ka aikam iajam.
Haba kren halor ka jingriewspah ka thain ha ki jaka jngohkai, u Modi ula ong ba ka culture ki briew bad ka spah mariang jong ka thain kala khring bha ia ki nongshangkai pyrthei na kylleng ki ri ka pyrthei. Ula bynrap ba ka Sorkar Pdeng kala ithuh ia ki Tourism Circuit bad ban sdang pynroi ruh ia ki ha ka thain.
U Modi ula kren ruh halor ka jingphah ia ki samla pule na ki 100 tylli ki University sha ka thain Shatei Lam Mihngi, ka ban iarap ha kaban pyniajan ia ki briew na kiwei pat ki thain. Ula ong ba kine ki samla ki lah pat ban long ki ambassador jong ka thain.
Haba kren halor ka jingkyntiew ia ki lad pyniasoh ha ka thain, u Myntri Rangbah Duh ula ong ba ka Sorkar kala lah ban pyndep ia kiba bun ki project shna jingkieng ba heh, kiba la sahteng baroh shi katta. Ha kine ki phra snem, ka jingdon jong ki kad liengsuin kala kiew naka 9 sha ka 16 tylli bad ka jingdon ki liengsuin kiba her bad wan hiar ha kine ki kad, kala kiew n aka 900 shuwa ka 2014 sha ka 1900 mynta.
U Modi ula ong ba bun ki Jylla ka thain kila don hapoh ka Railway map ha ka sien ba nyngkong bad ka jingpyrshang kala don ruh mynta ban pyniasoh san a duriaw. Ka jingjrong jong ka surok National Highway kala kiew da 50% naduh u 2014 hapoh ka thain.
Ula ong ba da ka jingpyllait paidbah sa ia ka PM-DevINE scheme, ki jingtei hapoh ka thain Shatei Lam Mihngi kila nang bun nang bun haba pyntip ba ka Sorkar ka dang pyrshang mynta ban pynjanai sa ia ka digital connectivity ha ka thain da kaba nang pynbun ia ki optical fibre network.
Haba kren halor ka jingpyntreikam ia ka Aatmanirbhar 5G infrastructure, u Modi ula ong b aka 5G kan iarap sted ha kaban kyntiew ia ka startup ecosystem, service sector nalor kiwei kiwei hapoh ka thain. Ula ong b aka Sorkar kala kut jingmut ban pynlong ia ka thain ym tang ka Centre of Economic Growth (ka jaka ban kiew ha ka ioh ka kot) hynrei ban long ruh ka cultural growth ( ban kiew ruh ha ka culture).
Haba kren halor ka synniang jong ka thain ha ki kam ialehkai, u Myntri Rangbah Duh ula ong b aka Sorkar ka dang pynkhreh ban ai ia ki jingkyrshan sha ki nongialehkai jong ka thain lyngba ka jingwanrah ia ka Sports University ba nyngkong hapoh ka Thain. Nalor kane, u pyntip ba la mynjur ruh halor 200 tylli ki Khelo India Centre ha ki 8 tylli ki jylla ka thain bad bun bah ki nongialehkai kila ioh jingmyntoi n aka TOPS scheme.
Nalor kine, u Myntri Rangbah ula kren ruh halor ka G20 Presidency ka India bad ong ba jingialang jong ka, kan sa sakhi ia ka jingwan jong ki briew na kylleng ki ri ka pyrthei sha ka thain Shatei Lam MIhngi. Kane kan dei ka kabu ban iohi pyni nam ia ka spah mariang, ka culture bad kiwei kiwei.
