Nongstoin, Nohprah 15 : a Free Morning K School kaba don ha ka sor Nongstoin, ka la ioh ban rakhe lehkmen ia ka jingkynjoh sha u mawmer jong ka 25 snem ne Silver Jubilee hynne ka sngi palei.
Ia kane ka jingrakhe la pynshongkun da ka jingiadonlang u Deputy Commissioner ka District Bah Garod LSN Dykes kum u kongsan bad i kong Lata Syiemlieh DSEO kum i symbud kongsan nalor ki Ophisar ka Tnad Pule Puthi, ki Nongseng ia ka skul bad kiwei kiwei.
Ia katei ka skul la seng da u Bah Kenneth Shadap naka bynta ki longiing kiba duna ha ka ioh ka kot bad da ki phew snem utei u nongseng u la shu siew hi dalade ia ka tulop sha ki nonghikai.
Kum shi bynta ban pynshit pynshngain ia katei ka jinglehkmen ki khynnah skul ki la iashimbynta shitrhem da ki jingpynbyrnia bapher bapher kaba kynthup ia ki jingrwai jingshad bad ki jingialehkai drama bad kiwei kiwei.
Kum ka dak jong ka jinglehkmen ha katei ka sngi la ioh ruh ban ot ia u kek bad la pyniaid ia katei ka jingialang da u bah Hillarius Kharbhih kum u shongknor.
U kongsan haba ai jingkren ha katei ka sngi u la ong ” ba u ai ka jingïaroh ïa u nongseng uba la ïohi jngai na ka bynta kiba donkam ka jingïarap bad kane kadei ka kam kum shi bynta ba phi trei ïa ka mission jong U Blei bad u la kyntu ruh ïa ki khynnah ba kin leh tip sngi bad trei minot namar lada phi pule phi ïoh ïa ka jingtip hynrei lada phi tip sngi bad minot kamdon kano kano ka bor kaba lah ban khang ia phi ban poi sha ka thong.
