Shillong, Nohprah 15 : U MLA ka Mylliem Constituency Bah Hamletson Dohling hynne ka sngi palei, ula pynbna ba un sa sei paidbah ia ka “Report Card” ka ban pyni ia ka jingtreikam jong u kum u Nongmihkhmat ha kine ki 5 snem hapoh ka Constituency.
U Bah Hamlet uba dei ruh u Myntri Sorkar, ula pynbna ia kane haba plie ia kaIingskul ha Nongrum, Mylliem ha kaba ula ong ba un sa shon ia kane ka “Report Card” bad un sa sam sha man ki thliew iing ha Mylliem Constutuency khnang ba ki paidbah kin nang ban bishar ia ka jingtreikam jong u”.
“Haba phi phah ia ki Khun sha skul manla u snem, haba kut u snem, ki khynnah skul ki ju ioh ia ka report card. Kumta, kum u MLA, ngan sa pyllait ia ka report card jong nga ban ailad ia baroh ba kin tip ia baroh ki kam ba nga la leh ha kine ki san snem kum u MLA.
Ngam shym la ioh ka lad ban trei bha ha baroh san snem namar arsnem la pynthut da ka khlam Covid-19” ong une u MLA.
Nalor kane, u MLA ula ong ba wat ha kine ki arsnem jong ka khlam Covid, kam shym la long leh noh eiei bad ba ula trei ruh ia ki kam kum u Nongmihkhmat bad ia kine ki kam yn sa pyni ha ka report card ban sa pynmih.
U Bah Hamlet ula pynpaw ruh ba naduh ka por ba ula shah jied kum u MLA ka Mylliem Constituency, ula wanrah haduh T.3 klur T.80 lak ban pynbha ia ki skul hapoh ka Constituency nalor ka jingplie ia ki hall jong ki skul ha Nongumlong LP kaba la mang haduh T. 37.02 lak.
Lah ban kdew hangne ba u Bah Hamlet Dohling u dei u Nongmihkhmat ba nyngkong eh jong kane ka samoi san snem (2018-2023) ban pynbna paidbah ba un sei madan ia ka report card halor ka jingtreikam ba san snem hapoh ka Constituency.
Ki khana kila iaid mynta ha Mylliem ba u Bah Hamlet uba la jop ia ka elekshon MLA 2018 na ka PDF, u lah ban pyniasoh noh ialade sah ka National Peoples’ Party (NPP) ban aireng ha ka elekshon MLA 2023. La khmih lynti ba une u Nongmihkhmat ka Mylliem u lah ban pynbna ia kane ka jingiasoh NPP ha ki taiew ba nyngkong jong u Kyllalyngkot 2023.
