Shillong, Nohprah 14 : U National Vice President ka NPP bad Symbud Myntri Rangbah ka Jylla Bah Prestone Tynsong hynne ka sngi balang ula ong ba ka Jylla Meghalaya kan sa kynran biang shadien lada ki paidbah ki jied ia ka All India Trinamool Congress (AITC) ha u 2023.
U Bah Prestone haba iakren bad ki nongthoh khubor ula pynpaw ba um iohi satia ba ka jingwan jong ka Myntri Rangbah ka West Bengal Mamata Banerjee kan nang pynkhlain ia ka lad jong ka AITC hapoh ka Jylla.
“(Ha ka jingshisha) ka jingwan jong ka Mamata Banerjee kan nang pyntlot ia ka bor jong ka AITC ha Meghalaya” ula ong.
Haba kylli, u Bah Prestone ula ong ba ka jingkylla kan wan beit lada ka AITC ka shah jied ban shimti ia ka bor bad kane ka jingkylla ka long “Ngin sa hiar arsut”.
“Lada ki paidbah ka Jylla Meghalaya ki kyrshan ia ka AITC, ai ba ngan kular ha phi ba kane ka mut ba ka Meghalaya ha ka jaka ba kan iaid shajrong, ngin sa nang iaid shadien. Kane kan sa jia bad ngam don jingartatien satia ia ka” ula bynrap.
U DyCM ula ong ba kane ka Chairperson ka AITC kan dang ban tip kham bha shaphang u Myntri Rangbah barim ka Jylla Dr Mukul Sangma.
“Ka Mamata Banerjee kam pat tip bha shaphang u Dr Mukul hynrei u Bah Prestone u tip lut ia baroh halor u Dr Mukul. Phra shen u shong ha ka shuki bad baroh ki lad pathai khubor ki tip bha shaphang jong u” ula ong.
Halor ka jingkam ka Mamata ba ka AITC kan pynbeit ia ka jingiakajia khappud lada ka shah jied ban wan ha ka bor , une u Nongialam ka NPP ula ong “Mano ba ong ia kata?. Oh ka Mamata Banerjee?. Haei ba ka sah?. Hato ka sah ha Meghalaya lane sah ha Assam?. Phi iohi biang ba ka dei ka boss jong ka AITC bad ka hap ban kren ia kane hynrei ngan iathuh ha phi ba katba ki arjylla kim pat ia mynjur lang, yn ym don mano mano ruh ba lah, la ka dei ka AITC, ka dei ka madan Mamata Banerjee, u Myntri Rangbah Duh ka Ri ne mano mano ruh. Ngi donkam ban don ka jingiasngewthuh jingmut kaba iajan hapdeng ki ar sorkar kata ka Meghalaya bad Assam”.
U Bah Prestone ula khein kam kai ruh ia ka jingkynnoh kane ka Nongialam ka AITC ba ka Sorkar MDA kam shym la leh eiei na ka bynta ki lanot kiba iap ha ka jingshah ther kuli ha ki Pulit Assam ha Mukroh, kaba jia ha ka 22 tarik u Naiwieng. Ula ong ba u Myntri Rangbah ka Jylla bad ka Kynhun Myntri baroh kawei kila leit iuhkjat sha kane ka shnong bad kala ai ia ki jingiarap kat kiba donkam sha ki longiing jong kine ki lanot ba iap kynthup ruh ia kiba mynsaw.
“Hooid, ka jingiakren ban kyntiew ia ka song jingiarap ka don. Nga tharai ka Sorkar ka dang bishar bha ia kane namar ym tang T. 5 lak hynrei ka lah ban long palat hynrei ngam lah ban ong eiei ia mynta namar ka Tnad ba dei khmih ka dang khmih halor kane” ong u Bah Prestone.
Hynrei ula pynpaw ba um lah satia ban ai kano kano ka jingkular halor ka jingdawa ban ai kam sorkar namar la dep bthah ia ka Tnad Political ba kan shong bishar ia kane ka bynta.
