Nongpoh, Nohprah 14 : Ka All India Trinamool Congress (AITC) hynne ka sngi Balang kala pynbna ia u Bah Gilbert Nongrum kum u kyrtong na Umsning Constituency ban mih aireng ha ka elekshon MLA-2023 haba pynskhem ruh ia ka Trinamool Congress Umsning Block.
La pynbna ia ka kyrteng u Bah Gilbert ha ka jingialang ba pynlong ha Umsning ha ka jingiadon ryngkat u MLA ka Umroi Bah George B Lyngdoh, ka kyrtong na Mawhati Dr Saralin Dorphang, ki Nongialam ka TMC na Ri-Bhoi ba kynthup ia u MDC barim Bah Fabian Lyngdoh, Bah CL Marsharing bad kiwei kiwei.
Haba kren ha ka jingialang, u Bah George B Lyngdoh, u la ïathuh ba bun ki nongïalam paidbah ki la mih na ki seng saiñ hima bapher bapher ban leit pynïasoh sha ka party ba synshar ïa ka sorkar jylla tang ban ïoh jingmyntoi shimet, hynrei ma u shimet ula mih na Congress ym ban leit pynïasoh sha ki party rhah bor hynrei u phai sha ka TMC kaba dei ka party kaba peit ïa ka hok u paidbah bad ka bha ka miat jong ki.
U la ong ruh, ba ka TMC ka don ia ka history kaba ïa jan bad ki paidbah ban wanrah ïa ka jingkylla ha ka synshar khaddar ban pynmyntoi ïa ki jingdonkam u paidbah naduh ka roi ka par bad ka hok jong u paidbah. Ula kynnoh ba kane ka Sorkar ba lamkhmat da ka NPP ka dei ka uniform jong ka BJP, kaba la shu synshar donbor bad pynbun sa ki kam bamsap.
“Ngi sngewsih ba ka BJP ha ka ri India ka la pynduh ïa ka sngi shuti ha ka sngi rakhe jong ki paid Christan ïa ka Christmas kaba long kum ka jingiuhroit ïa ka jingsngew jong ki paid Christian, hynrei ka sorkar TMC ha Calcutta ka la pynbit pynbiang ïa kane ka sngi kyrpang jong ki paid Christian watla ki long kiba rit paidbah ha Calcutta”, ong u Bah George B Lyngdoh.
Ka jingkhang ka BJP ban bam doh masi ha ka jylla Assam, ka la ktah shikatdei ïa ki paid ka jylla Meghalaya haduh ba ka dor ka la kiew shaduh 700 shikilo kaba la ktah ïa ki paidbah ka jylla bad wat ki nongot doh masi bad bun ki jingeh, hynrei ka sorkar jylla kam shem la sngap ïa kine ki jingeh jong ki paidbah.
Ki nongkitkam ka TMC Umsning Block, kiba la jied bad pynskhem ha kane ka sngi, ki kynthup ïa u Bah Gilbert Nongrum kum u President, u Bah Livingstone Barim, General Secretary nalor kiwei kiwei.
