Shillong, Nohprah 14 : U Deputy Commissioner ka East Jaintia Hills Abhilash Baranwal ula pynjari da ka kynhun 144 CrPC ba pyrrkhing ia ka jingiaid kali ha kawei ka surok bad kawei ka jingkieng ha East Jaintia Hills.
Kat kum ka hukum, une u Khliehduh ka District ula mana ia ki kali ba kit palat pud ba kin iaid na ka jingkieng Shymplong kaba don ha surok Borghat-Sonapur, kaba la shu shna shipor da ka jingkieng Bailey hadien ka jingshah rong noh ka jingkieng ha kane ka lyiur bala lah.
Ula ong ba kat kum ka kaiphod na ka Tnad PWD, la ong ba kane ka jingkieng ka lah ban kyrshan tang ia ki kali kiba ka jingjia ka long hapoh ka 9 ton.
Kawei pat ka dei ka surok PMGSY ha Lakasein kaba pyniasoh ia ka Semasi-Umkyrpong sha Kseh kaba la julor namar ka jingiaid jong ki kali ba kit mar palat pud.
Namar kane, ula pynjari ia ka kynhun 144 CrPC ba khang ia ki kali kit mar ba heh ba kin iaid na kane ka surok.
