Kohima, Nohprah 14 :Ka kynhun jong ki laingut ki dkhot ba la thaw ka ka Tnat kam pohiing ka sorkar pdeng kan pynlong ka jingleit jurip sha Nagaland ha ka 16 tarik mynta u bnai ban bishar bniah ha kaba iadei bad ka jingdawa ban pynioh la ka jong ka jylla ‘Frontier Nagaland’.
Ka Eastern Nagaland People’s Organisation (ENPO) ha ryngkat ki katto katne ki kynhun seng kila dawa la ka jong ka jylla ‘Frontier Nagaland’ ka ban kynthup ia hynriew na ki 16 tylli ki district ka jylla.
Katkum ki khubor, ia katei ka committee ka sorkar pdeng yn lamkhmat da u adviser ka thain North East, u A K Mishra ha ryngkat ki arngut ki dkhot kum u Dr Mandeep Singh, Joint Director, Intelligence Bureau bad u A K Dhayani, Director (North East Division, MHA) ki ban pynlong ka jingleit jurip ia ka thain mihngi ka Nagaland.
Ki khubor ki kam ruh ba ha kane ka jingwan jurip kitei ki dkhot kin pynlong ka jingiakynduh ia ki nongialam ka ENPO, ki heh sorkar ka jylla, ki nongialam jong ki kynhun trai shnong, ki nongialam ka Eastern Nagaland Women’s Organisation, Eastern Nagaland Students Federation, ki nongialam shnong bad ki riew tymmen.
Nalor kata, kane ka committee kan pynlong ruh ka jingleit jurip ia ka International Trade Centre, Dan, Pangsha, ha Noklak district ka thain mihngi ka Nagaland hajan khappud ka Myanmar ha ka 18 tarik mynta u bnai.
Ha kaba sdang jong une u bnai, ki nongialam ka ENPO kila pynlong ka jingiakynduh ia u Myntri ka sorkar pdeng u Amit Shah ha New Delhi bad na ka liang une u Myntri ula pyntip ha ki ba u lah ban pynlong ka jingleit jurip ia ka Eastern Nagaland ha u bnai Kyllalyngkot 2023.
Hadien ka jingdawa ban thaw la ka jong ka jylla ‘Frontier Nagaland’ kumba hynniew tylli ki kynhun jaidbynriaw ka eastern Nagaland kila kyntait ia ka jingkyrpad jong ka sorkar da kaba kyntait ban wan iashim bynta ha ka tamasa ‘Hornbill Festival’ kaba shiphew sngi kynthih kaba la kut noh ha ka 10 tarik mynta u bnai.
Ha u bnai Risaw mynta u snem haba shim ia ka lynti jong ka jingiakhih ban dawa la ka jong ka jylla na ka bynta ki paidbah nongshong shnong ka eastern Nagaland, na ka liang ka Central Executive Council (CEC) ka ENPO ka la dawa ia ka jingiehnoh kam jong ki 20 ngut ki nongmihkhmat ka Eastern Nagaland na ka iingdorbar thaw ain ka jylla bad ban pynkloi ban pynbeit na ka liang ka sorkar India ha kaba iadei bad kane ka jingdawa la ka jong ka jylla “Frontier Nagaland.”
