Guwahati, Nohprah 14 :Ha kawei na ka jingjop kaba khraw na ka bynta ki pulit ka Assam, ka kynhun ki runar niah thuk thuk kiba donkti ha kaba pyniap ia kawei ka longkmie da kaba tynrah da ka thuk thuk ha Bilasipara bad pynpaw ia kane ka jingjia lyngba ka social media kila shah kem noh.
Ki pulit kila kem noh ia arngut ki runar kiba donkti ha kaba iadei bad katei ka jingjia shah pyniap jong katei ka longkmie.Ia kine ki arngut la tip kyrteng kum u Minhazul Karim ia uba la tip bha kum u Rohan bad u Akhir Ahmed.
Ki pulit kila ong ba kila ioh ban kem noh ia kine ki arngut ki ruanr na Gauripur bad na ki bynta jong ka Halakura.
Kham hashwa, kata ha ka 12 tarik mynta u bnai, kane ka kynhun ki runar kiba dang khie samla ia kaba la tip kum ka “Gangs of Devil” napoh Dhubri district ka Assam kila thep ia ka video ha ka social media jong ki ban batai bnaih kumba ba uwei na ki dkhot jong ki ula pyniap ia kawei ka longkmie da kaba tynrah da ka thuk thuk.
Ki tyllong khubor kila kam ba uwei napdeng ki runar jong kane ka kynhun ula tynrah da ka thuk thuk kaba ula pynher sted bha pyrshah ia kawei ka longkmie ba la tip kyrteng ka Sakina ha Bilasipara kaba la pynlong ia kane ka longkmie ba kan khlad noh hashen.
Uwei na ki runar jong kane ka kynhun ‘Gangs of Devil’ ula pynpaw lyngba ka social media jong ki da kaba ong, “Une u nongniah thuk thuk ula pyniap iwei bad mih noh na ka jaka set jong ki pulit tang hapoh ka 10 minit.”
“Kane ka dei ka bor jong ka kynhun ‘Gangs of Devil’ bad mynta ngi dang don hapdeng ka jingialehkmen,” pynpaw kane ka kynhun.Kane ka jingjia kala wanrah ka jingsngewkhia kaba jur ha kaba iadei bad ka jingtreikam jong ki bor ka ain bad halor katei ka rukom thombor pyrshah ia katei ka longkmie kaba la khlad noh hashen.”
Ha kawei pat ka bynta, ka video ba la pynsaphriang da katei ka kynhun runar kala saphriang lyngba ki social media ha kaba kiba bun na ki nong pyndonkam social media kila dawa ban kem mardor ia kine ki runar kiba bun jingma ia ka imlang ka sahlang.
