Itanagar, Nohprah 14: U MP na Arunchal-East uba dei ruh u nongialam jong ka Bharatiya Janata Party (BJP) u Tapir Gao hynnin ka sngi ba Ar ula pynrem jur ia ki shipai People’s Liberation Army (PLA) hadien ba ka la mih ka jingiakynad hapdeng ki bor shipai ka India bad ka China hajan ki bynta khappud jong u LAC ha Tawang sector ka jylla.
Ka jingjia jong ka jingiakynad ba dang shen hapdeng ki bor shipai ka India bad China kala jia ha Galwan valley hapoh Ladakh ha u bnai Jylliew 2020.
“Kaei kaba kila leh ka long kaba bakla.Watla katta, wat hadien ki jingiai pyrshang ki jong ki, ngim shym la randien wat tang shi inshi ruh.La kila pyrshang katno katno ruh, ki bor shipai jong ngi kin pynphai kylliang da kaba tyngeh,” ong u Gao.
“Lyngba ki tyllong khubor ngi la ioh jingtip ba kane ka jingiakynad ka dei kaba la jia shisha.Ki shipai na baroh arliang kila ngat ha ki jingmynsaw.Ki shipai PLA barabor ki ju pyrshang ban leh ia kiba kum kine ki polisi kyntur pud ha ki bynta jong u McMahon Line.Kila pyrshang ban jam sha ki bynta u pud u sam jong ka India kaba la pynlong ia ki shipai India ba kin pynphai kylla da kaba tyngeh.Kaba kum kane ka jingiakynad ba khah khah kan ktah jur ia ka jingiadei hapdeng ka India bad ka China.Da lade hi shimet Nga pynrem jur ia kine ki jingleh jong ki shipai PLA,” ong shuh shuh utei u MP.
Ha kawei pat ka bynta, na ka liang u Myntri Iada Ri u Rajnath Singh ula pynshai ba ym shym la don ki shipai kiba iap ne mynsaw jur ha katei ka jingiakynad.
Hadien katei ka jingiakynad kaba la jia ha ka 9 tarik mynta u bnai, na ka liang ka tnat shipai ka ri bad ki heh sorkar kin iakynduh mynta ka sngi ban iamir jingmut ha kaba iadei bad ki sienjam kiba bud.
“Ha ka 9 tarik mynta u bnai, ki shipai PLA kila pyrshang ban jam sha ki bynta jong u LAC ha ki bynta jong ka Yangste kaba hapoh Tawang sector da kaba pynkhein ruh ia ka status quo.Hynrei, ia kane ka jingpyrshang jong ka China la aireng da ki bor shipai ki jong ngi ha ka rukom kaba biang.Kane ka jingiakynad ka la lam ruh sha ka jingialeh kaba marmet ha kaba ki shipai ka India da ka jingshlur kila lah ban khanglad ia jingpyrshang wan tur jong ki shipai PLA sha ki bynta u pud u sam jong ka ri bad kaba la pynlong ia ki ba kin leitphai noh sha la ki jong ki jaka shong.Kane ka jingiakynad kala wanrah ruh ka jingmynsaw ia ki katto katne ki bor shipai sha baroh arliang.Nga kwah ban pyntip hapoh ka iingdorbar ba ym shym la don kiba khlad ne mynsaw jur sha ka liang ka jong ngi,” ong u Rajnath Singh haba kren halor kane ka mat hapoh ka dorbar Parliament.
