Shillong, Nohprah 13: U Myntri Rangbah ka jylla Conrad K Sangma hynne ka sngi u la pyntip ba u Myntri Rangbahduh ka ri India u Narendra Modi un wan shim bynta haka jingrakhe dap 50 snem ka North Eastern Council (NEC) ka ban long ha nongbah Shillong ha ka 18 tarik mynta u bnai.
Haba kren sha ki lad pathai khubor u Conrad u la iathuh ba u Myntri Rangbah duh ka ri India un don kumba 2 ne 3 kynta ha Shillong ha kaba u pyniaid ruh iaka jingialang jong ka NEC.
“Hoid la thikna ba u Myntri Rangbahduh ka ri India u Narendra Modi un wan ha nongbah Shillong haka 18 tarik mynta u bnai ban shim bynta ha ka jingrakhe dap 50 snem ka NEC” la ong u Conrad.
U Conrad u la iathuh ba u Myntri Rangbahduh ka ri India un don ha Shillong tang katto katne kynta bad hadien kane un sa mih noh na Shillong ban leit sha kiwei pat ki prokram.
U la iathuh ba ka sorkar ka dang pynkhreh lut iaki jingdonkam khamtam haba iadei bad ki lad jingiada (Security) ha kaba ka sorkar kan hap ban iatreilang bad ka SPG ban leh iaka ba donkam lada wan u Myntri Rangbahduh ka ri India.
