Shillong, Nohprah 10 : U President barim ka FKJGP Bah Wellbirth Rani, ula lum lang ia la ki jong ki nongkyrshang bad ki paidbah ha Mawphlang Constituency, ban iarai lang ia u kyrtong ban leit ai jingkyrshan ha ka elekshon MLA-2023 na kane ka Constituency.
U Bah Wellbirth u dei uwei na ki samla rangbah ula iaid kylleng ki jaka ka Mawphlang Constituency da ka jingthmu ban mih aireng ha ka elekshon 2023 bad ula leit ruh ban pyniasoh sha ka seng riewlum ba khlain duh ka Jylla-ka United Democratic Party (UDP) ha ryngkat ki nongkyrshan ban mih iakhun na kane ka Party.
Ka Mawphlang Constituency ka dei kaba mihkhmat da u MLA ka UDP Bah Eugeneson Lyngdoh hynrei une u Nongmihkhmat ula shim rai dang shen ban nym mih iakhun shuh ha kane ka elekshon ban wan.
Ka jingleh politic jong ki Nongialam ka UDP, kala pynlong ia u Bah Wellbirth ban rai ban nym mih shuh ha kane ka elekshon ban wan. Ka UDP haduh mynta ka dang wad ia u kyrtong ban pynmih na kane ka Constituency.
Hynnin ka sngi thohdieng, u Bah Wellbirth ula lum ia ka jingialang bad ki nongkyrshan ha la ka jong ka Iingsah ha ka Shnong Mawliehpoh ha ryngkat ka jingdon jong ki Longkmie ka thain ban iamir jingmut halor ki kam ki jam ba iadei bad ka elekshon.
Haba kren ha ka jingialang, u Bah Wellbirth ula ong ‘Wat lada ngam mih iakhun shuh ha kane ka elekshon ban wan hynrei ngan iai bteng ha ka ban kit bad tynrong lem ia ki jingeh jong ka thain”.
Ula pyntip ba ha kane ka jingialang, la iamir jingmut ruh halor ka rai bala shim dang shen ba lada iadon jingmut ban leit kyrshan ia uno uno u kyrtong, yn ialeit kum ka kynhun ha ryngkat ki kyndon ba u kyrtong u dei ban pynthikna ba ka kam pynroi kan dei kaba nyngkong eh namar ka jingshah iehkhunswet ha baroh ki liang.
Ha kane ka sngi, u Bah Wellbirth ula sam ruh ia ka song jingiarap da ka pisa sha ki 8 tylli ki Self Help Group jong ka shnong Mawliehpoh.
