Agartala, Nohprah 10 :Ha ka jinglong jingman kaba dang shen ha ki kam sain hima sima hapoh Tripura, u heh nongialam ka kynhun kieng atiar FMR National Liberation Front of Tripura (NLFT) u Daniel Borak ha ka 9 tarik mynta u bnai ula leit pyniasoh ia lade bad ka seng BJP.Une u nongialam ka FMR NLFT ula ong ba ula ioh mynsiem lyngba ki jingtrei jong u Myntri Rangbahduh (PM) Narendra Modi na ka bynta ki trai shnong riewlum bad kumjuh ruh ula shim ia ka rai ban wan pyniasoh bad kane ka party.
Katkum ka kaiphot la ong ruh ba kila don haduh 29 ngut ki dkhot jong ka kynhun FMR NLFT kiba la wan ban pyniasoh ia lade sha ka seng BJP ha ryngkat u Daniel Borak.
Ia kane ka kynhun kieng atiar National Liberation Front of Tripura (NLFT) la seng ha ka 12 tarik u bnai Lber 1989, ha kaba u Dhananjoy Reang (uba dei u Vice-President barim jong ka Tripura National Volunteers) ula bat kum u chairman.U Reang hadien ba ula shah beh noh na ka seng NLFT ha u snem 1993, ula thaw noh la ka jong ka kynhun ia kaba la tip kum ka Tripura Resurrection Army (TRA), hynrei ula pyndem wait noh ha ka snem 1997.
Hadien ka jingshah weng noh jong u Reang, u Nayanbasi Jamatiya ula shimti kum u nongialam jong kane ka kynhun bad hadien sa u Biswamohan Debbarma. Hynrei kala mih sa kawei pat ka jingiapait ha u bnai Nailur 2000 hadien ba kala mih ka jingiapher jingmut hapdeng u Halam bad u Debbarma kiba dei ki dkhot jong ka NLFT.
Kumta ruh la thaw ia kawei pat ka kynhun kaba la ai kyrteng Borok National Council of Tripura (BNCT) da u Jogendra ia uba la tip kyrteng kum u Joshua Debbarma.Hynrei, namar ka jingangnud ba shimet hapdeng ki nongialam bad namar ka jingpynshong nongrim halor ka jingsngew niam la ngeit ba ka dei ka dawbah kaba la wanrah biang ka jingiapait ha u snem 2001 hadien ba u Nayanbasi Jamatiya bad u Biswamohan Debbarma kila mih noh na ka seng kmie na ka bynta ban thaw ia kawei pat ka tnat jong ka NLFT hapoh ka jingialam ka jong ki.
Ia kane ka seng NLFT la khein beain ha u bnai Iaiong 1997 hapoh ki kyndon a Unlawful Activities (Prevention) Act, 1967, kata namar ka jingdonkti ha ki kam pyntriem. Nalor kata la pynngat ruh ia kane ka kynhun hapoh ki kyndon Prevention of Terrorism Act (POTA), ha u snem 2002.
