Agartala, Nohprah 09 : U Myntri Rangbah (CM) ka Tripura, u Manik Saha ula ong ba ki nongshong shnong ka Gujarat kila ai ka jingkyrshan kaba pura ia ka BJP ha ka ilekshon Assembly kaba dang shu dep namar ka jingsynshar kaba paka bad ka jingkiew sted ha ka liang ka roi ka par.
Nalor kata u CM Saha ula pynlong ka jingkhot ia ki nongshong shnong ba kin ai bang ka jingkyrshan ia ka BJP ha ka bor khnang ba kan lah ban bteng ia ki kam pynroi ha ka jylla, bad kyntu ruh ia ki ba kin ym pynphai biang sha ka jingsynshar kaba rim kaba la sakhi tang ia ki jingiaumsnam bad ki kam pyntriem kiba harukom.Ula ong ruh ba ka BJP kan ieng pyrshah ia kino kino ki kam lehbor bad ki jingiaumsnam da ka jingthmu ban ioh ha ka bor hapoh ka jylla.Ka jingpynlong ia ka ilekshon sha ka iingdorbar assembly ha Tripura kan long ha u bnai Lber 2023.
U Saha uba la aijingkren ha ka jingialang jong ki nongtrei ka BJP ha Santir Bazar ha South Tripura district ula ong, “Ki nongshong shnong ka Gujarat kila ai ka jingkyrshan kaba pura ia ka BJP ba kan wan ha ka bor synshar namar ki kam pynroi ki jong ka.Ki briew ha Tripura ruh ki dei ban leh kumjuh.” Watla katta um shym ka kren ei ei ha kaba iadei badka Himachal Pradesh ha kaba ka Congress kala knieh noh ia ka bor na ka BJP.
Shuh shuh u CM ka Tripura ula kynthoh tyngeh ruh ha kaba iadei bad ka jingsynshar ba 35 snem jong ka party Left hapoh Tripura da kaba ong ba ka CPI-M ka dei kaba donkti ha ki kam iaumsnam, ki kam pyniap, ki kam leh beijot bad kiwei pat ki kam pyntriem…Kumta ki nongshong shnong ka jylla ki dei ban pynjngai ia lade na kane ka Communist party. “Ha ka synshar paidbah, baroh ki don ia ki hok hynrei kano kano ka jingpyrshang ban pyndonkam da ka bor ha ki kam sain hima sima kin ngat ha ki sienjam kiba tyngeh,” ong u Saha.
Nalor kata u Saha ula kynthoh tyngeh ruh ia ka TMC da kaba ong ba kala pynlong ia ka Bengal kum ka mini Pakistan. Ula ong ba ki nongshong shnong ka West Bengal kila thait la ngiah ia ka jingsynshar donbor kaba la neh mynta 34 snem kynthih bad kila kwah ban pynduh pyndam noh ia kane ka rukom synshar communist. “Ki paidbah kila vote ia ka TMC na ka bynta ka jingsdang kaba thymmai.Hynrei kane ka sorkar ba mynta ka dang kham sniew shuh shuh ban ia ki sorkar ba la leit noh,” ong u CM ka Tripura.
