Shillong, Nohprah 09: Ka jingjop ka Indian National Congress(INC) hapoh ka jylla Himachal Pradesh ne ka jingshah rem hapoh ka jylla Gujarat kan ym don jingktah eiei ia ka INC ha ka ilekshon MLA 2023 ka ban wan ha Meghalaya.
Ia kane la ong da u Working President ka Meghalaya Pradesh Congress Committee (MPCC) u bah Pynshangiñ N Syiem uba la ong ruh ba ka rukom iakhun ilekshon ha Jylla Meghalaya ka iapher bad ha kiwei ki jylla hapoh ka ri India.
U bah Pynshngain u la ong ba ki paidbah ka jylla kim dei ban sngewthuh bakla ba tangba ka rem ka Congress ha Gujarat kan rem lut sha kiwei ki jylla namar iaka nuksa la sakhi mynta ka sngi hapoh ka jylla Himachal Pradesh, ha kaba ka Congress ka la lah ban pynliem noh iaka Bharatiya Janata Party (BJP).
“Watla la ka ilekshon ha Meghalaya ruh kala jan artad, ki paidbah kidei ban sngewthuh ba ka rukom iakhun ilekshon ka iapher bak ly bak na kiwei pat ki jylla bad kan don beit ka jingrem ne ka jingjop bad naka liang ka MPCC ruh kan ialeh katba lah ban pynthikna ba ka Congress kan ioh ka jingjop ha Meghalaya kum ba ka jop hapoh ka jylla Himachal Pradesh” la ong u bah Pynshngain.
U bah Pynshngain u la ong ba ka jingjop ha Himachal Pradesh kan ai mynsiem iaka party bad iaki nongkitkam bad iaki nongkyrshan ka party ba kin dang trei shitom ban pynkhreh sa iaka ilekshon 2023 ha Meghalaya.
U la iathuh ruh ba haduh mynta ka Congress ka don ka jingthmu ban iakhun lut na baroh 60 tylli ki konstitwensi bad haduh mynta ka Party kala dep ban ioh haduh 40 ngut ki kyrtong kiba la pynkhreh ban iakhun iaka ilekshon 2023.
