Shillong, Nohprah 05 : U President ka Meghalaya Pradesh Congress Committee (MPCC) ma Vincent H Pala hynne ka sngi nyngkong ula ong ba ka jingmih jong u MLA barim ka Jylla AT Mondal ban pyniasoh sha ka NPP, kam don jingktah satia ia ka Congress party.
“Kam don jingktah satia namar ngi lah dep tip lypa ( ban jia) 6-7 bnai mynshuwa bad ngi la pynkhreh ia ka bad ngi la don ruh ia u kyrtong uba biang bha na Phulbari. U dei u Ophisar barim ka Tnad Agriculture” ong u ma Pala.
U Mondal u dei ruh u Lamphang barim ka Iingdorbar Thaw Ain ka Jylla, uba la pyniasoh sha ka NPP ha ka 3 tarik u Nohprah.
Ula ong ba ka jingiehnohkam jong u Mondal kam shym la pynlyngngoh namar ki bahaiing hasem jong u, kila dep rung lypa sha ka NPP haba bynrap “Ngi kum ka party ngi la dep tip lypa”.
U ma Pala ula pynpaw iaka jingsngewskhem ba ka Congress kan ioh ia ka jingjop na Phulbari Constituency.
“Ka jingkylli ba kan ktah kam mih satia. Ka vote ki garo ka don kumba 11000 haduh 12000 bad ki vote muslim ki don kumba 20000. Hynrei, ki don ruh bun ngut ki kyrtong Muslim..ngi don ia u kyrtong bala nang la stad bad ba don kyrdan bad ngi kyrmen ba ngin lah ban leh bha na Phulbari Constituency” ula ong.
U ne u Nongialam ka Congress ula ong b aka Congress kan nang leh bha ban ia kaei kaba ki paidbah ki khmih lynti ha kane ka elekshon MLA 2023 ha Ri-lum Garo. Kane ka dei namar ka party ka don ia ki kyrtong kiba biang, kiba dang khynnah bad kiba don kyrdan.
