Shillong, Nohprah 04 : Da ka jingthmu ban kyntiew ia ka IT (Information & Technology) ha Meghalaya, ka Sorkar Jylla kala mang T. 115 klur ban tei sa kawei ka IT Park ha Mawdiangdiang, New Shillong Tonwship bad ka jingpyntrei ia kane ka project kan sdang naduh u Kyllalyngkot 2023.
Ia kane la pyntip da u Myntri Rangbah ka Jylla Conrad K Sangma ha ka jingialang plie paidbah ia ka (24)7.ai IT Park hynnin ka janmiet sngi saitjain.
“Ka Kylla ba-ar jong ka IT Park, kaba long T.115 klur la dei ban mang pisa da ka Sorkar bad ngi dei ban lah khot tender noh ia ka kam ban lah sdang ia ka jingtei ia kaba la khmih lynti ha u Kyllalyngkot 2023. Ka jingtei ia kane ka IT park ba thymmai ka ban heh arshah ia kaba don mynta, kan sdang naduh u bnai ban wan” ong u Myntri Rangbah.
“Kane ka pyni ia ka jingthmu ba don da kane ka Sorkar bad ka jingkut jingmut bad jingngeit ba kane ka dei kawei ka kam kaba lah ban iarap bha bad aikam aijam ruh ia bun ngut ki samla jong ngi” ula bynrap.
Ka jingheh jong ka jaka ban tei ia kane ka IT Park kaba ar kan long haduh 40 acre.
Haba kylli, u Myntri Rangbah ka Jylla ula pyntip ba ka Meghalaya Secretariat ba thymmai kan ieng ha ka jaka ba marjan bad kane ka IT Park ha Mawdiangdiang.
“Ngi don jingthmu ban tei ia ka Secretariat ba thymmai ha ka thain. Ha lyndet jong kane ka IT Park kan ieng ka Secretariat ba thymmai. Ngi la shim katto katne ki jaka jong ka IT Park sha ka Secretariat Zone hynrei ngi dang ieh sa 40 acre ka jaka” ula ong.
U Myntri Rangbah u pyntip b aka Sorkar kala don jingthmu ruh ban pyntrei sa ia ka phase balai bad ba saw jong ka IT Park.
“Hynrei kam long kaba suk ia ngi ban trei shi sien trei ia baroh namar ki don ki jingeh kum ka jingdonkam pisa. Hynrei lada ngi iohi ba ka jingdawa ka kam ka don, ngin sa jam shisien jam shakhmat bad pynthikna ba ia ka master plan baroh yn pyntreikam shisien pyntreikam” ula ong.
Ha kajuh ka por u Animesh Jain, Chief Delivery Officer ka (24)7.ai, ula pyntip b aka Customer Solution(CS) bad ka Contact Centre Service (CCS) kan long beit da ki trai shnong bad ka jingmuthi ka long ban thungkam bad ai jinghikai ia ki trai shnong.
“Ka samla na ka Jylla Meghalaya kila tei bha bad ngi don ia ki kynhun ban thung ia ki briew bad ialam ia ki sha Bangalore. Na ka jingshem jong ngi, ki briew na Jylla Meghalaya kila pyni shisha ia ka jingtbit ha ka jingtreikam bad kumjuh ruh ban iakren iakhana bad ki briew kiba donkam ia ka jingshakri jong ka (24)7.ai” ula ong.
U Jain ula pyntip ruh ba ka kompani kala jied ia 15 tylli ki jaka hapoh ka Ri baroh kawei ban buh ia ka IT Park bad ka jaka ba jied nyngkong eh ka dei ka Shillong namar kiba bun ki daw-ka jingdon ki briew ba don sap, ka jingnang ha ka kren ka khana, ka jingioh ia ki jaka trei, ka rukom im bad kiwei kiwei.
U Jain ula pyntip ba ha (24)7.ai kala sdang ban treikam ha Jylla bad kala dep ban thung palat 250 ngut ki trai shnong kiba donsap ban treikam bad kan sa thung kam biang sa palat 2500 ngut ha kine ki arsnem ban wan.
