Nongstoin, Nohprah 1: Da ka jingthmu ban pynkhreh ia ka jingpynlong ia ka jingjied nongmihkhmat MLA ne ka Meghalaya Legislative Assembly Election 2023, ka Election Branch jong ka West Khasi Hills ka la pynlong ia ka jingai training mynta ka sngi ka 1 tarik u Nohprah 2022 ha Trysem Hall DC office Nongstoin.
Ha kane ka training la pyniaid da u bah H.K Thabah ADC, u ba long ruh u RO jong ka 34-Mawshynrut Assembly Constituency, u ba la batai bniah ia ki kyndon bad ki ain khamtam ia ka jingbthah jong ka Election Commission jong ka Ri India (ECI), ha kaba iadei bad ka Model Code of Conduct, kiba kynthup ia ki jingtreikam jong ki Flying Squad Team, ki Static Surveillance Team bad kiwei kiwei.
Ha kane ka training la wan ban ia shim bynta da ki RO jong ka 32-Nongstoin bad 33-Jyrngam Assembly Constituencies, ARO, AERO, ki ERO, ki Sector Officer, Zonal Officers, ki bor pulit, ki District Heads nalor kiwei pat.
