Shillong, Nohprah 01 : Ka Sorkar Meghalaya Democratic Alliance (MDA) hynne ka sngi Palei kala pynurlong ia ka jingangnud bala slem bha jong ki nongshongshnong ka Dalu, da ka jingplie paidbah ia ka Dalu Civil Sub-Division ban ai jingshakri ia ki paid ka thain.
Ia kane ka Civil Sub Division la plie da u Myntri Rangbah ka Jylla Conrad K Sangma ha ka jingiadonlang u MLA ka thain u Brening A Sangma bad ki Ophisar Sorkar.
Our priority to bring all-round development for Meghalaya starts by bringing administration closer to the people especially in areas where special attention is required.
The Dalu Civil Sub-Division will embark blessings for further progress of its villages.
— Conrad Sangma (@SangmaConrad) December 1, 2022
“Ka dei ka sngi sah kynmaw ia ki paidbah ka Dalu. Kane ka sngi kan neh ha ka jingkynmaw jong ki paidbah ha ki snem ban sa wan. Ka dei ka jingurlong ka jingphohsniew bala slem bha jong ki paidbah ba sah ha ka thain” ong u Myntri Rangbah haba pynkynmaw ia la u jong u Kpa (L) Purno A Sangma, uba la pyndep ia ka jingpule ha ki kyrdan pule bar it na ka skul Missionary kaba don ha Dalu.
U Myntri Rangbah ula pyntip ha ka jingialang ba u (L) Purno A Sangma u don ka jingsngewjan bha ia ki paidbah ka Dalu bad u ju pynpaw bha ia ki jingeh bad ki jingthrang ban kyntiew ia ka jingim jong ki.
“U (Purno) u don ka jingkwah ban wanrah ia kiba bun ki kam pynroi. Hynrei, namar kid aw bym lah kiar, u khlem lah satia ban pyndep. Kawei na ki jingkwah jong u ka long ban ioh ia ka Civil Sub Division ha Dalu. Nga da kmen shibun ba ngi la lah ban plie ia ka Civil Sub Division kaba dei ka jingphohsniew bala slem bha jong ki paidbah ka thain” ong u Conrad.
Haba pyntip ha ka jingialang ia ki jingeh ba ka Sorkar ka hap ban mad na ka jingwan lynshop ka khlam Covid, u Myntri Rangbah ulaong “Ngi la mad shibun ki jingeh ban wanrah ia ki kam pynroi ha kine ki 4.5 snem hynrei wat hapdeng kine ki jingeh, ngi la trei shitom ban lah wanrah ia ka jingkylla ha ka jingim jong ki briew jong ngi”.
“Ka Sorkar jong ngi kala trei khlem shongthait ban wanrah ia ka roi ka par na ka bynta u paidbah. Ka jingphai khmat sha ki kam bapher bapher, la ka dei ka pule ka puthi, ka koit ka khiah ne ka kam ialehkai, ka dei ka sakhi ia ka jingkut jingmut jong ngi sha u paidbah ban kyntiew ia ka jingim jong ki” ula bynrap.
U Conrad ula pyntip ruh ba ka Sorkar kala treikam da ka kynja mission ban pynthikna ba ki jingshakri jong ka Sorkar kin poi ha ki jingkhang iing jong ki paidbah.
Ka jingpynkha ia ki Block Thymmai bad ki Civil Sub Divisoon ha kylleng ki jaka ka Jylla ka long eh ban pynsuk ia ki paidbah ba kin ioh ia ki jingmyntoi na ki jingshakri jong ka Sorkar ha ka rukom kaba sted bad ka janai bha” ong u Myntri Rangbah.
