Jorhat, Nohprah 01:Katba ka jingjia ther kuli kaba la jia ha kane ka sngi Saitjain ba la lah ka dang iai pyrshong syier ia kiba bun balang, hynnin ka sngi Balang kala mih sa kawei pat ka jingjia shah rahbor jong uwei u khynnah na ka bynta ban dawa pisa kaba la nang pynher syrngiew shuh shuh ia ki nongshong shnong.
Katkum ki khubor la iathuh ba u Amarjit Prasad 17 snem rta uba dei u khun jong u Radhe Prasad ba shong ba sah ha Jorhat ula mih na la iing ha ka por 4 baje janmiet da ka thuk thuk hynnin ka sngi Balang.Hashwa ba un mih na la iing u Amarjit ula ong hala ka jong ka kmie ba un sa wanphai tang shiphang por.
Hynrei, hadien ba Amarjit um shym la wanphai hadien slem slem, kumta ruh na ka liang kiba haiing hasem kila iai pyrshang ban phone ha ka mobile phone ka jong u kaba la switched off.
Hynrei, ha ka por kumba 8 baje mynmiet jong katei ka sngi, uwei u khynnah samla ula shim ia ka phone bad ong ha u kpa jong une u khynnah ba une u khun jong u, ula shah rahbor.Nalor kata une u nong rahbor ula dawa ruh haduh T.50 lak na kane ka longiing.
Hadien jong kane ka jingjia baroh kiba haiing hasem jong utei u khynnah kila pynpaw ka jingkyndit kaba khraw.Hadien kane kiba haiing hasem kila leit ban ujor noh hapoh Jorhat Sadar police station. U Amarjit u dei uba dang pule ha ka klas X ha Hemlata Handique High School, Jorhat.
Na ka liang ki bor pulit ka Jorhat kila sdang ban pynlong ia ka jingtohkit halor kane ka jingjia sdang ruh ban pynlong ka jingwad ia une u khynnah lyngba ki jingiaphone lyngba ka phone.
Ha kawei pat ka jingjia shah rahbor, uwei u khynnah samla ia uba la tip kyrteng kum u Biswajit Hazarika ula shah rahbor noh na Guwahati.Ki nong rahbor kila dawa ka pisa kaba heh bha na kiba haiing hasem jong u.U Biswajit u dei uba trei hapoh ka pharmacy ha Jayanagar.U Biswajit ula shah rahbor noh katba u dang wanphai sha la iing na ka jaka trei jong u.
