Guwahati, Nohprah 01 :Ka Dibrugarh University hynnin ka sngi Balang kala beh noh (expelled) ia ki sawngut ki samla pule kiba donkti ha kaba iadei bad ka kam thombor (ragging) hapoh ka hostel jong kane ka jaka pule.
“Kine ki samla kiba la shah beh noh na ka bynta lai snem kynthih ki kynthup ia u Galab Deka, 3rd Semester uba pule ha ka (Life Science), Kamaleshwar Chutia, 3rd Semester (Mathematics), Mousum Phukan, 3rd Semester (Applied Geo Physics), bad u Pusang Kham Boruah, 2nd year (Tai Language),” ong ki bor pyniaid ka University ha ka jingialang bad ki lad pathai khubor.
Nalor kane, kine ki samla pule kila shah khanglad ruh ban ioh rung klas ha kino kino ki jaka pule na ka bynta lai snem kynthih.
Ha kawei pat ka bynta, na ka liang u lanot jong ka Dibrugarh University uba la ngat ha katei ka jingshah thombor, u Anand Sharma hynnin ka sngi Balang ula kynnoh ba u General Secretary uba dang shu shah jied shen jong ka university postgraduate students’ union (DUPGSU) ruh u donkti lang ha kaba iadei bad kane ka jingjia baroh.
Ha ka jingkren sha ki pulit ia kaba la rekod hapoh ki kyndon Section 143 CrPc, u Sharma ula kynnoh ba u general secretary ka DUPGSU u Ankur Bora u donkti ruh ha kaba knieh noh ia ka mobile phone ka jong u.
Kumjuh na ka liang ki bor pulit ka Dibrugarh University kila sospon noh ruh ia ki laingut ki warden hadien jong katei ka jingjia.
Shuh shuh halor kane ka jingjia na ka liang ki bor pulit kila kem biang sa ia uwei pat uba donkti ha katei ka kam thombor ia uba la tip kyrteng kum u Subhrojyoti Baruah, uba pule ha ka 3rd Semester ha ka sobjek Political Science.Nalor kata ki pulit kila rah noh sa ia uwei pat u samla pule ia uba la tip kyrteng kum u Newar na ka bynta ban pynlong ka jingtohkit.
Mynta baroh kila don sawngut ki samla pule kiba la shah kem kat haduh mynta namar ka jingdonkti ha katei ka kam thombor hapoh ka hostel jong ka Dibrugarh University.
Ha ka 29 tarik u Naiwieng 2022, u Myntri Rangbah (CM) ka Assam u Himanta Biswa Sarma ula kynthoh ia ki bor ba dei khmih jong ka University halor ka jingbym lah ban khmih bad pyndep iala ka jong ka kamram.
“Ka jingjia kaba la jia ha u bnai Nailur 2022 ka pyni ba ki bor ba dei khmih jong ka university kila pulom ban shim ia ki jingpynshitom,” ong u CM Sarma haba aijingkren ha ka jingialang bad ki lad pathai khubor hadien ka cabinet meeting ha Silchar.
“Kat haduh hynnin ka sngi ka kynhun tohkit kam pat shym la ai ia kano kano ka kaiphot kaba pyni halor ka jingpulom ha ka liang ki bor ba dei khmih jong ka Dibrugarh university” ong shuh shuh u CM ka Assam.
