Shillong, Naiwieng 30: Ki nongialam ka BJP Meghalaya kila pyntip ba ka sorkar Assam kala phah pynsangeh iaka eksam Staff Nurse jong ka NEIGRIHMS kaba dei ban long ha jylla Assam bad la bthah ruh ia ka NEIGRIHMS ba kadei ban pynlong ia katei ka eksam ha jylla Meghalaya.
Ia kane la iathuh da u President ka BJP Meghalaya u Bah Ernest Mawrie hadien ka jingwan iakynduh ia u Myntri Rangbah ka Assam u Himanta Biswa Sarma hynne ka sngi Balang ha Assam Secretariat.
U Bah Mawrie ula iathuh ba bun ngut ki samla pule ka Meghalaya kila mad jingeh ban ialeh iaka eksam jong ka NEIGRIHMS ha Assam kumta kila pynsngew ia kane ka jingeh ki samla ha u Himanta Biswa Sarma ba yn tuklar lem khamtam haba ki samla ka Meghalaya kim sngewshngain ban ialeh iaka eksam ha Assam.
“U Himanta Biswa Sarma ula phone hakhmat jong ngi ka kynhun na Meghalaya ia u Deputy Commissioner ka Kamrup ba ym dei ban shah ban pynlong iaka eksam jong ka NEIGRIHMS hapoh ka jylla Assam bad ula phone ruh ia u Director ka NEIGRIHMS ban phah pynsangeh noh ia katei ka eksam bad dei ban pynlong beit ha Meghalaya namar ba ka NEIGRIHMS ka don ha ka nongbah Shillong” la ong u bah Ernest Mawrie.
U Bah Sanbor Shullai bad u Bah AL Hek kila ong, ka eksam thungkam ha NEIGRIHMS kadei ban long beit ha Shillong bad kam long kaba iahap ban long shabar ka jylla Meghalaya namar kan wanrah iaka jingduhnong iaki samla pule ka jylla Meghalaya khamtam haba kam long kaba shngain iaki ban leit ialeh ia katei ka eksam shabar ka jylla.
