Ampati, Naiwieng 30: Ka khaii ka pateng ha ka iew khappud (Border Haat) Kalaichar, South Garo Hills kala sdang biang hynne ka sngi Balang hadien shisnem ka jingkhang khyrdep namar ka jingwan lynshop ka khlam Covid-19.
Ia kane ka Iew Khappud la plie biang ha ka jingiadon ryngkat ki bor pyniaid District na Meghalaya bad na Kurigram District ka Bangladesh.
Kane ka iew khappud kala khang khyrdep naduh u Lber 2020 namar ka khlam Covid-19 bad la plie biang ha u Kyllalyngkot 2021 hynrei hadien kane la khang khyrdep biang namar ka jingwan lynshop ka khlam ha ka kylla kaba ar.
Ha kane ka jingialang plie ia kane ka Iew Khappud, ki bor pyniaid District na India la mihkhmat da u AVD Shira, Additional Deputy Commissioner ka Ampati lem bad ka kynhun ki Ophisar na ka District lem bad ki Pulit ka District.
Kane ka jingplie biang ia ka Iew kala pynkmen shi katdei eh ia ki nongshongshnong namar kila ioh lad biang ban pynsdang ia ka kam khaii pateng khamtam ba kin ioh kamai shuwa ban wan ka jingrakhe ia ka Christmas bad Snem Thymmai.
