Shillong, Naiwieng 30 : Ka Hill State People’s Democratic party (HSPDP) hynne ka sngi Balang kala pan ia ka jing kyrshan na baroh 36 ngut ki MLA bad ki 60 ngut ki MDC ka Khasi Jaintia, ban pynkha iala ka jong ka Jylla Khasi Jaintia State.
“Ngi pan ia ka jingkyrshan jong baroh ki 36 ngut ki MLA bad ki 60 ngut ki MDC ka KHADC bad JHADC halor ka jingdawa jong ngi ban pynkha ia ka Khasi Jaintia State” ong u Bah Sandondor Ryntathiang, President ka HSPDP Youth Wing haba iakren bad ki nongthoh khubor hadien ka jingialang jong ka CEC.
U Bah Sandor ula ong ba baroh ki nongmihkhmat paidbah la pdiang sngewbha sha ka seminar halor ka jingdawa Jylla la ka jong, ka ban pynlong da ka Party ha ka 5 tarik u Nohprah bad u Prof LS Passah ka NEHU bad u Robertjune Kharjahrin, Nongialam ka HYC kin dei ki nongkren ha kane ka seminar.
Une u Nongialam ka HSPDP Youth Wing, ulapyntip ba ki Nongialam ka HSPDP kin sa leit ruh sah sha Delhi haduh lai sngi ban pynbor ia ka Sorkar India ba kan mynjur noh halor ka jingdawa bala slem jong ki paid Khasi bad Jaintia.
“Ngan ym kren eiei than halor ki buit treikam ba kumnongin iaid shakhmat ia kane ka kam hynrei ha ka 14.15 bad 16 tarik u Nohprah, ngin sa leit sha Delhi ban iakynduh ia ka Sorkar Pdeng bad ban kyrpad ba kin mynjur noh ia ka jingdawa ban pynkha ia ka Khasi Jaintia State la ka jong” ula ong.
Ha kajuh ka por, u pyntip ba ka HSPDP kala rai ruh ban sam ia ki khusnam sha ki nongjop ha ka jingiakop thoh essay ka ban long ha kane ka seminar.
Ula pyntip ruh baka Party kala rai ban sa aiti noh ia ka Iing ba dang shu pynshna thymmai sha kawei ka Longiing ha Mawblei, Mawthadraishan ha ka 20 tarik u Nohprah.
Haba ai jingkhein ia ka jingpynrung dkhot, ula pyntip ba palat 2500 ngut ki samla kila wan pyniasoh ialade sha ka HSPDP.
“Kane ka dei ka dak ba pyni ba ki samla kila kdang ia kiwei ki seng sain pyrthei bad kila rai ban phaikhmat sha ka HSPDP da ka jingkrmen ba ka Party ka dei na ka bynta jong ki” ong u Sandor.
