Nongstoiñ, Naiwieng 29: Ka kyhnun jong ki Self Help Group hapoh ka shatri jong ka Village Organisation kiba don ha ka shnong Siejlieh, kawei na ki shnong kaba don ha sor Nongstoiñ, ka la kynjoh shi snem mynnin ka sngi 28 tarik Naiwieng 2022.
Kum shi bynta ban ïa lehkmen, ki VO ba kynthup ïa ka Langdait Mylloiñ Village organisation, Ngintei Ïalawei Mawthongthang Village organization, Pdengshnong Self Help Group bad kiwei kiwei, mynnin ka sngi ki la ïoh ban rakhe ïa katei ka jingdap 1 snem da kaba pynlong ïa ka jingïalang ha phyllaw skul sorkar kaba don ha katei ka shnong Siejlieh.
Ia kane ka jingrakhe la pynshongkun da ka jingiadonlang u bah Macmillan Byrsat MLA ka Nongstoiñ konstitwensi u la long kum u kongsan, bah Kevin Wanniang Cluster co ordinator, bah Happiness Tympuiñ sordar ka shnong Siejlieh, samla Deborlan Kharsyntiew Secretary ka shnong Siejlieh bad kiwei kiwei ki riew rangbah jong ka thaiñ.
U kongsan haba ai jingkren u la ong, “Ka jingdon jong ki VO ha ka shnong ka wanrah ïa ka ïoh ka kot ha ki longïing longsem bad ka wanrah ruh ka jingpynmyntoi ïa ka pyrkhat pyrdaiñ ha u briew bad ki nongshong shnong”.
Une u MLA u la ai khublei bad kitbok kit rwiang ia baroh ki dkhot bad nongïalam jong ka Village Organisation, ba kin nang trei shitom bad ban nang ïai kiew shakhmat ha ki liang baroh, khamtam ban kyntiew ïa ka rukom im rukom pyrkhat, khnang ban roi bad kiew ha ki liang baroh ha ka imlang sahlang.
