Nongstoiñ, Naiwieng 28: U samla Jylliew Singh Marweiñ President ka kynhun Hynñiewtrep Achik People Council, kaba dei kawei na ki seng kaba dang shu mih pyrthei dang shen ha West Khasi Hills District, u la leit ban ai da ka jingthoh hakhmat u Deputy Commissioner Nongstoiñ, ban buddien ïa ka jingpyntrei ïa ki skhim bapher bapher ha West Khasi Hills.
Haba kren sha u nongthoh khubor hadien ka jingïakynduh bad u DC, u samla Jylliew u la ong ba ka seng HAPC ka la buddien ïa ki jingpyntrei ïa ki skhim bapher bapher kiba ka sorkar ka la ai sha ki paidbah.
La ong ruh ba hadien ka jingbuddien, katei ka seng ka la lap ïa shibun ki jingpyndonkam bakla da ki bor kiba halor haba ïadei bad ki kam pynroi, khamtam eh ka jingpyntrei ïa ki skul kiba don ha ka thaiñ jong ka Mawshynrut C&RD Block.
U la ong ba ka seng ka suba jur ba ka don ka jingbam klop ïa ka pisa, namar ba ym shym la kynthup ïa ki dkhot jong ka Management Committee jong ki skul kiba la ïoh ïa ka pisa na ka sorkar, ha ka jingpyntreikam da ka Public Implementation Committee jong ka Mawshynrut C&RD Block.
Ula ong na ki dak ki shin ki pynpaw ba ka pisa kaba la mang ne ïoh, kam ïahap satia bad ka jingpynlut ha kitei ki skul, kumta ka seng kala ai shi syndon da ka jingthoh ha u DC, ba un phah tohkit ha kaba ïadei bad kitei ki scheme shna skul, kynthup ïa ka skul ha Riangdim, Nongjri bad kiwei kiwei.
U la ong ba kane ka jinglap jong ka seng kan ym kut tang lyngba ki lad pathai khubor, hynrei un nang ïai bteng ban buddien haduh ban da lap ïa kaei kaba don sha lyndet.
U la buh jingkylli ba balei ym shym la kynthup ïa ki bor pyniaid jong ki skul bad balei la shu pyntrei ïa ki kam katkum ka mon jong u nongshna (contractor), khlem da ai jinghun ïa ki nongpynïaid skul. Ki bor jong ka District ki hap ban phah tohkit, lym kumta kane ka kam ka hap ban jam shaduh sha ïing bishar, ong utei u samla
