Shillong, Naiwieng 29: Ki samla ba thep kam pulit hynne ka sngi kila pynbna ban pyniaid beit shakhmat iaka jingiakhih daka ba shong kyllain mungor hakhmat ka ophis treikam ka MBOSE ban dawa pyllait noh iaka Result kam Pulit.
Ki bor district ka East Khasi Hills hynne ka sngi kila khot iakren ia kine ki samla ba ap iaka Result bad la bthah ba kin iakynduh ia u DIG (SB) ha Police Headquarter (PHQ) ban ioh jingshai halor ka jingslem ban pyllait iaka Result.
Haba iakren bad kine ki samla, kila pynpaw ba kin pyniaid beit shakhmat iaka jingiaid paidbah namar ki samla kim lah shuh ban iai ap iaka jingleh mynthi naka liang ka sorkar ban pynbna iaka Result
Uwei na ki samla u la ong ba kane kam dei shuh ka sien ba nyngkong ba ki samla kin hap mih madan ban iakhih pyrshah ka jingslem ban pynbna iaka Result. Ula ong baka ophis ka Deputy Commissioner (DC) ka la mana ban pynlong ia kane ka jingiakhih hynrei ki samla ba ap result ki la rai ba kin pyniaid beit ia kaba la thmu.
“Ia kane ka kam Pulit la ialeh eksam naduh u 2019 hynrei haduh mynta naka liang ka sorkar ka dang pynslem ban pynbna iaka Result bad kum ki samla ha ka sien kaba saw ngin hap ia mih madan biang ban pynkynmaw ia ka Sorkar” la ong uwei na ki samla.
Uwei na ki samla u la ong kum ki samla kiba khmih lynti ban ioh kam ioh jam kim don eiei ban kynthoh iaka sorkar ne ia u Myntri ka tnat kam pohïng hynrei ki dawa ba ka por kala dei ia ka sorkarba kan sngap lem iaka jingud jingnam jong ki phew hajar ngut ki samla ka jylla.
U samla u la kyntu ia kiwei ki samla ba ap kam Pulit ban wan shim bynta ha ka jingiakhih daka ba shong kyllain mungor hakhmat ka ophis treikam MBOSE naduh 11 baje mynstep.
