Agartala, Naiwieng 29 :Haba aijingkren ha ka jingialang bad ki lad pathai khubor u AIG (Law and Order) u Jyotishman Das Chowdhury ula ong ba ki kam shong shngain hapdeng ki riew paidbah kala kham biang shibun hadien ba ka jingdon jong ki kam pyntriem kum ki kam pyniap briew, ki kam tuh kam lute bad kiwei pat ki kam pyntriem kila hiar arsut ha ka jylla.
“Da ka jingtrei shitom jong ki bor pulit ka Tripura, ki kam pyntriem ba bunjait kila hair arsut ha ka jylla.Tang ha u bnai uba la dep, ki bor pulit kila ioh ban kem noh ia ki nongtuh nonglute ha ka jylla bad ioh ruh ban kurup noh ia ki mar ki mata kiba la shah tuh.Ki jingpyrshang jong ki pulit ban lapdien bad ban kem ia ki runar kiba donkti ha ki kam tuh kam lute ki dang iai bteng,” ong utei u heh pulit.
Utei u AIG ula ong shuh shuh ha kaba iadei bad kiwei pat ki kam pyntriem kum ki kam pyniap briew bad ki kam thombor pyrshah ia ki kynthei nalor kiwei pat, ki briew kiba la shah kynnoh donkti kila shah kem noh mardor hadien ba kila leh ia kine ki kam bymman.
“Tang ha une u bnai ba la dep, baroh kila don haduh hynniew ngut ki briew kiba la shah kem noh halor ka jingdonkti ha ki kam pyniap briew, katba 33 ngut kila shah kem noh halor ka jingshah kynnoh donkti ha ki kam thombor ia ki kynthei, kata kaba kynthup ia ki kam leh beijot,” ong shuh shuh u AIG.
Ha kaba iadei bad ki kam iakhun pyrshah drok, ki pulit ka Tripura kila ioh ban kurup haduh 8359 kilo u kynja ba la thad tyrkhong, 454.3 gram u drok heroin, 1062 bilor ka dawa jyrhoh beain bad 34665 ki dawai kular yaba tablet.
“Ha ka jingkhynra kaba kyrpang haduh kumba 48,000 ki jaka rep kynja la lah ban pynduh noh.Ha kaba iadei bad kane la rejistar haduh 34 tylli ki case hapoh ki kyndon bapher bapher jong ka NDPS Act, bad la kem noh ia 42 ngut ki briew.Kiba kum kine ki jingkhynra ba kyrpang kin dang iai bteng ha ki sngi ki por ki ban dang wan khnang ban pynthikna ba ka Tripura kan dei ka jylla kaba lait na u drok,” ong shuh shuh u heh pulit.
Shuh shuh ha kaba iadei bad ka jingtreikam jong ki bor pulit traffic enforcement, tang ha une u bnai ba la dep haduh T.75 lak la ioh lum ka pisa dain kunar hapoh ki section bapher bapher jong ka MV Act, bad na ka liang ki bor pulit ki dang pynlong ruh ia ki jingkhynra ba kyrpang ban khanglad halor ka jingpyndonkam ia ki iit iong ha ki kali, ka jingbym don ia ki high-security number plate, ka jinglong jingman jong ki kali bad kiwei pat.
