Guwahati, Naiwieng 29 :Ia ka jaka set slung ne ka ‘detention camp’ kaba heh tam ha Asia ia kaba la tei ha ki bynta jong ka Matia hapoh Goalpara district ka Assam shen yn plie noh hajan kaba kut jong u bnai Nohprah mynta u snem.Ha kane jaka yn set ia kito ki koidi ba la pynbna kum ki bar ri.
Katkum ki khubor, ia kane ka jingtei la tei ha ka jaka kaba heh kumba 25 akar ha ka jinglut kaba T.64 klur da ka Housing Department jong ka sorkar Assam bad ia kaba lah ban plie noh hajan kaba kut jong u bnai Nohprah u ban wan.
Katkum ka jingiaid jong ka kam la ong ba ka jingtei ia kane ka iing kala dep haduh kumba 90 percent.Na ka liang u Arvind Kalita uba dei u Managing Director, Housing Department ka sorkar Assam ula pynlong ka jingwan jurip ia kane ka jaka bad bishar bniah halor ka jinglong jingman jong kane ka camp.La synran lang ia u da u Satyendra Nath Baishya uba dei u Assistant DIG, Prisons Department ka sorkar Assam.
Kane ka jaka set ka ban ban kdup haduh kumba 2000 ngut ki briew, kata ha kaba yn set ia kito ki briew ba la ithuh kum ki bar ri.Ka jingtei ia ki 15 tylli ki building kiba heh hapoh kane ka jaka la lah ban pyndep.
Kane ka camp kan don ruh ia kiwei pat ki jaka treikam kaba kynthup ia ki hospital, ki skul, dispensary, ki jaka bam kiba heh, library, ki jaka iew, ki jaka pynbyrngia, police station bad ki jaka pynmyllen na ka bynta ki khynnah.
Ia kane ka jingtei la sdang ban tei naduh ka snem 2018.Katba na ka liang ka sorkar kan dang pynbna ha kaba iadei bad National Register of Citizens (NRC) hapoh ka ri baroh kawei, hynrei kiba bun bah kiba kum kine ki jaka set la tei ha ki bynta bapher bapher jong ka ri.
