Shillong, Naiwieng 28 : Ka All India Trinamool Congress (AITC) hynne ka sngi kala pynpaw ia ka jingbym sngew iahap halor ka jingthung jong ka Sorkar Assam ia ka Judicial Enquiry ia ka jingjia Mukroh haba ong ba ka daw hi ka dei namar ba ka Mukroh ka dei ka shnong kaba hap hapoh u pud u sam ka Meghalaya.
Ka AITC kaba don ha Liang Pyrshah kala ban jur ruh ia ka jingdonkam ba thaw ia ka Sorkar thymmai ne pynjari da ka Synshar President ha Meghalaya haba pynpaw ba kane ka Sorkar ba mynta kam don hok shuh ban nang bat ia ka synshar khaddar hadien ka jingshah siat iap ki 5 ngut ki paid Khasi ha ki Pulit ka Assam ha Mukroh.
Haba iakren bad ki nongthoh khubor hadien ka jingialang ki seng sain pyrthei bala lum da u Myntri Rangbah Conrad K Sangma, u Nongialam ka AITC bad Chief Whip ka Liang Pyrshah Bah George B Lyngdoh ula ong ba ka Sorkar kala ong ba ki don haduh 2 tylli ki Judicial Enquiry Commission bala thung-kawei na Assam bad kawei na Jylla Meghalaya.
“Mynta ngi pynpaw ia ka jingbym iahap ia ka Judicial Commission bala thung da ka Sorkar Assam namar kane kala long shabar u pud jong u..kane ka jingjia ka jia ha Mukroh kaba dang hap hapoh u pud u sam ka Meghalaya” ula ong.
Une u MLA ka Umroi ula buh jingkylli “Ka Judicial Enquiry ka ban sa thung da ka Meghalaya ruh kumno ban treikam ia kito ki briew kiba hap hapoh ka jingkhmih ka Assam khamtam ki Pulit kiba don hapoh ka jingpyniaid ka Sorkar Assam. Hato ki Judicial Enquiry jong ngi kan lahban jam shabar u pud ka Meghalaya bad tian bishar ia kine ki briew kiba hap hapoh ka jingpyniaid ka Assam?. La ka enquiry commission bad ki jingai jingmut jong ka kin treikam? Kane ka dei kaba pynartatien ia ngi”.
U Bah George ula ong baka Sorkar Jylla kala pynpaw ba kan sa khot ia ka jingtohkit CBI lane ka NIA ban tohkit ia kane ka jingjia..”Hynrei, ngim tip lano kin wan. Ngim tip la ka Sorkar Pdeng kala mynjur shisha ne em lane la kan dei ka jingtohkit CBI ne ki kynja Judicial enquiry ruh ngim don jingtip” ula ong.
Haba dawa ban kem mardor ia ki Pulit ka Assam bad ki Forest Guard kiba donkti haba siat, u Bah George ula ong” Namar kara, kaei kaba ngi ong ka long balei ba ngim buh ia ki Task Force lane ki Pulit ba kin leh ia ka kam bad kumba ngi la ong teng ba ngi dawa ia ka Sorkar ba ki briew ba donkti ki dei ban shah kem bad dei ban pynmih noh mardor ia ka arrest warrant da ka Tnad Pulit pyrshah ia ki briew ba donkti namar ka dei ka kam pyniap briew kaba la leh ha khyndew ka Meghalaya bad ki Pulit ka Jylla ki dei ban behthong ia kine kiba donkti”.
U Bah George ula ong ba ka Liang Pyrshah ka dawa ruh ia ka Sorkar Jylla ban ai kam ia iwei na ki bahaiing hasem jong kine ki briew ba iap bad ban shimkhia ruh ia ka bailut baisep haba iadei bad ka jingsumar jong kiba mynsaw.
