Shillong Naiwieng 27: Ka Sarajanai Village Organization, Tyrsad Umkseh, kaba hap hapoh ka Pamsanngut Sirdarship ryngkat ka jingiatreilang bad ka Nehru Yuva Kendra Sangathan, Shillong, haka 26 tarik u Naiwieng kala rakhe iaka Constitution Day ne ka Sngi ka Riti Treikam ka Ri India haka jingialang kaba la long ha iïngdorbar ka shnong Tyrsad Umkseh.
Ia katei ka jingialang la pyniaid da ka samla Ibakordor Rynjah kaba long ka National Youth Volunteer ka NYKS, Mawphlang Block bad ha kane ka jingrakhe, ki nongiashimbynta kila pule ruh ia ka Preamble ka Riti Treikam ka Ri.
U Sub-Inspector of Schools, Mawkyrwat u Bah Staising Kharbteng kum uwei na ki riewshem phang haba ai jingkren, ula pynpaw ba kumno la thaw ia ka Riti Synshar ka Ri lyngba ka Constituent Assembly bad ia ki hok jong ki nongshong shnong ba la pynkupbor da ka Riti Synshar ka Ri bad ula pynkynmaw ruh ia ka kamram jong ki nongshong shnong ka ri ban noh synñiang na ka bynta ka bha ka miat jongka Ri.
Katba u Bah J.Nonglang OC, Mawngap Police Station u la ong, ba ki nongshong shnong kidei ban mih shakhmat ban iatreilang khamtam bad ka tnat kam pohïing khnang ba kan don ka jingiadei kaba jan hapdeng ki paidbah bad ki tnat sorkar.
Katba ka Kong Mary Rani kaba long ka nongsaid aiñ kala batai bniah halor ki khyrnit kiba pher bapher kiba don ha ka Riti Treikam ka Ri ba kumno ki paidbah kin sngewthuh ia ki kyndon ba la pruid dak da ki nongialam ka Ri kiba ai iaki hok laitluid iaki nongshong shnong.
Nalor kane la ioh ruh iaka jingkren na u Bah Ridley Rangslang, Bah David Khasain uba long u Rangbah Shnong, Kong Sunalin Rynjah bad ka Kong Ritngen Umdor.
