Karimganj, Naiwieng 17: Kawei ka longiing ha Karimganj, Assam kala ngat ha ka jingjia shah pynshitom kaba kham pher lyngba ki nongialam niam hadien ba uwei na ki dkhot ka longiing jong ki u Fuzail Ahmed Chowdhury ula mih noh na ka Congress bad leit pyniasoh sha ka seng BJP.Mynta kane ka longiing kala shah khang pyrshah ban ioh rung hapoh ka jaka mane blei ne mosque.
Kane ka jingeh kam kut tang katta.Nalor kane ka jingkhang ban rung hapoh ka mosque, ki khun jong u Fuzail Ahmed Chowdhury ruh kila shah pynsangeh ban pule hapoh ka skul Islamic da ki nongialam niam.
Wat ki nonghikai shimet ruh kila shah khang pyrshah ban aijinghikai ia ki khun ki kti jong u Fuzail Ahmed Chowdhury.Kane ka longiing kala iakynduh ia kane ka jingeh hadien ka jingleit pyniasoh sha ka party synshar.Da kane ka jingpyrkhing pyrshah ia u bad ka iing ka sem, mynta u Fuzail ula don hapdeng ka kut lad.
“Nga la mih noh na ka Congress bad leit pyniasoh sha ka BJP naduh kine ki khyndiat sngi ba la dep.Namar kane ka jingleit pyniasoh BJP, ki khun jong nga kila shah khang ban rung hapoh ka skul niam.
“Ka Masjid committee kala pyllait da ka jingthoh kaba kdew ba ki khun jong nga kin ym lah ban pule skul hapoh ka Masjid.Nga la kyrpad ia ki ban shong iakren, hynrei kila myntait ia kane ka jingkyrpad jong nga.Nga kwah ban kylli ia ki.Kaei ka kam bymman kaba ngi la leh? Balei ba ki khun jong nga kin shah khanglad ban ioh ia ki jinghikai niam?” ong u Chowdhury.
Kane ka jingjia la ong ba kala jia hapoh ka shnong Badamiz kaba hap hapoh Badarpur assembly constituency jong ka Karimganj district ka Assam.U Fuzail Ahmed Chowdhury u dei u nongshong shnong jong ka shnong Badamiz bad don hapoh ka seng Congress mynta la slem bha.Da ka jingbitar ia kane ka jingleh ka jong u, kiba bun na ki nongshong shnong khamtam ki rit paid kila ieng pyrshah ia u.
Mynta dei tang u Fuzail Ahmed Chowdhury u dkhot jong ka seng BJP hapoh katei ka shnong kaba bun ki nongkyrshan ka Congress.U Fuzail u don arngut ki khun shynrang bad kawei ka khun kynthei kiba don ia ka jingthrang ban long ki IAS bad IPS ophisar.
“Ki khun jong ngi kila shah khanglad ruh ban ioh pdiang ia ka pule puthi ha ki nonghikai shimet.Uwei u briew ia uba la tip kyrteng kum u Ali ula ujor sha u president ka Masjid Committee da kaba ong ba ki khun jong ngi kim lah ban ioh pdiang ia ka pule puthi.Mynta ki khun jong nga kila ong ba kin ym ioh ban bteng ia ka jingpule namar ka jingpyniasoh jong nga ha ki kam sain hima.Ka jingkyrpad ka jong nga ka long ia ka sorkar. Kaei ka kam bymman kaba ngi la leh da kaba pyniasoh sha ka BJP, ngi la ngat ha ka jingshah banbor kaba ktah jur ruh ia ki jingmut jingpyrkhat.Nga kyntu ia ka sorkar ba kan shim ia ki lad jingpynshitom ban weng ia kane ka rulom synshar Taliban na kane ka shnong bad ka district baroh kawei,” ong shuh shuh u Fuzail Chowdhury.
Na ka liang kane ka longiing mynta kala kyntu ia ka jingtuklar lem jong u Myntri Rangbah ka jylla halor kane ka jingjia bad ba ki dang ap ruh ia ka jubab.
