SHILLONG, Naiwieng 08: Ka seng Hynniewtrep Integrated Territorial Organization (HITO) haka jingiatreilang bad ki bor district, hynne ka sngi ba-ar, ki la hiar jurip iaka thain Keating Road namar ka jingiohpdiang ia ka jingujor na ki paidbah khamtam eh ki samla pule ka Lady Keane college, ba kane ka jaka kala kylla ktem dih kynja, dih kyiad bad dih drok.
Haba kren sha ki lad pathai khubor u President ka HITO bah Donbok Dkhar u la ong ba ka seng kan nym ailad ia uno uno u briew na kano kano ka jaidbynriew ban wan shong thadlad ha katei ka jaka kaba long ruh ka lynti ban leit sha Lady Keane kolej.
U bah Donbok u la ong ba kane ka jingwan jurip kadei namar ki samla pule kane ka kolej ki sngew syier ban iaid marwei namar man ka por don beit kiba shong dih kyiad, kynja bad drok ha kane ka lynti.
“Ka seng ka maham ruh la ka long ki Khasi ne kino kino kiba dei na kiwei ki jaidbynriew ba kim dei ban wan shong thadlad ha kane ka jaka bad lada ka seng ka lap, kan pynshitom bad kan aiti shaka ain” la ong u bah Donbok.
U bah Donbok u la kyntu ruh ia ki bor District bad ki pulit ba kim dei ban shah shuh ban pynieng kali ha kane ka jaka lait noh tang ia kiba wan skul ne wan buh skul bad dei ban pyndait noh iaki kor CCTV ha kine ki jaka.
U la ong ba mynta ka sorkar kala pynjari daki kyndon 144 CrPC ha baroh ka sor Shillong kumta kane ka aiñ kam dei ban treikam tang iaki Khasi hynrei kadei ban treikam ruh wat iaki bar jylla.
