Shillong, Naiwieng 04: U Myntri ka Sorkar Pdeng uba khmih ia ka tnad Jal Shakti, u Gajendra Singh Shekhawat hynnin ka sngi u la iashimbynta ha ka jingialang iamir jingmut halor ka “Space Applications in Flood Management in the North Eastern Region” ha North Eastern Space Applications Centre (NESAC), Umiam, Meghalaya.
U Myntri u la wan jngoh ar sngi ia ka jylla Meghalaya ban pynlong ka jingpeit bniah ia ki kam pynroi ba iadei bad ka tnad jong u.
U Shekhawat u la pynpaw ka jingkyrmen ha ki sienjam jong ka Tnat Jal Shakti bad ong ba ka jingthmu ka long ban pyndonkam katba lah ia ka teknoloji bad ka jingstad saïan ban wanrah ia ka rukom treikam kaba biang ban weng ia ka jingeh na ki jingshlei um ha ka thain shatei lammihngi.
Ula ong, ba u Myntri Rangbahduh ka ri u Narendra Modi u don ka thong bad ka jingkut jingmut ban wanrah baroh ki kam pynroi ha ka thain shatei lammihngi ha kaba ula pynbna bun ki skhim bad la pyntreikam ruh bad hapoh ka jingialam jong u Modi la shim bun ki sienjam ban pynpoi ki lad jingiarap sha ki jylla ka thain shatei lammihngi kiba shah ktah ha ki jingshlei um.
Hadien kane u Myntri Sorkar Pdeng ula iashimbynta ha ka jingialang ban peit ia ki kam kiba iadei bad ki skhim bapher bapher jong ka Sorkar Pdeng kum ka Jal Jeevan Mission, Pradhan Mantri Krishi Sinchayee Yojana-Har Kher Ko Pani, Springshed Development Project for Rejuvenation of Springs for Climate Resilient Development ha Meghalaya bad kiwei kiwei.
Ka Sorkar Pdeng ka la pyntip ruh ia u Myntri shaphang ki sienjam jong ka Sorkar na ka bynta ka jingtyngkai ia ka khyndew bad ka um ba dang pyntreikam ha ka jylla lyngba ka jingiashimbynta lang ki bor shnong kum ki projek hapoh ka Meghalaya Basin Development Authority, ka Climate Adaptive Community Based Water Harvesting Project ba bei tyngka da ka ADB bad kiwei kiwei ki projek.
Ha ka jingiakren bad ki lad pathai khubor hadien kane ka jingialang, u Myntri u la ong ba u Myntri Rangbah Duh, u Narendra Modi u la plié paidbah ia ka ‘Jal Jeevan Mission,’ na Red Fort ha ka 15 tarik u Nailar, 2019. Ka projek ‘Har Ghar Jal’ ka dei shi bynta kane ka mission, kaba thmu ban pynbiang um dih lyngba ki kor ha man ka iing ha ki jaka nongkyndong jong ka India shuwa u snem 2024. Kane ka sienjam ka thmu ban pyllait ia ki longkmie na ka jingleit tong um ban pyndonkam ha ki iing jong ki bad kane ka sienjam ka pynsuk ia ki briew bad ka wanrah ruh ia ka burom jong ki briew kiba sah ha ki jaka nongkyndong jong ka ri.
U Myntri ula pyntip ba na ka thong 19.15 klur tylli ki iing ha ki jaka nongkyndong ka India, 10.44 klur, lane palat 54 %, mynta ki ioh um kor bad ka jingkiew ha ka ri ha kine ki snem ka long 36 %.
Haba ianujor bad ka jingiaid shakhmat ka JJM ha Meghalaya bad ki jingjop ha ka ri, u Myntri u la ong ba ha ka por ba la plié paidbah ia ka skhim, ka jylla ka duna ia ka 1% ki iing ha ki jaka nongkyndong kiba ioh um kor. Ha kine ki snem, la ong u Myntri, ka Meghalaya ka la jam shakhmat bad ka la lah ban kot sha ka 41.5 % ka jingpynbiang um kor.
U Myntri u la bynrap ba katba ka jingkiew ha ka ri ka long 36 %, ka Meghalaya ka la lah ban jam shakhmat haduh 41 %.
“Mynta ngi la peit biang ia ki jingeh hakhmat ka jingpynbiang um kor ia baroh ha ka jylla bad kumno ban pynbeit ia kane. Na ki 6.30 lak tylli ki iing, la lah ban pynbiang um kor ha ki 2.61 lak tylli ki iing.Nga ngeit skhem ba ka Meghalaya kan lah ban pynbiang um kor ia ki iing kiba sah shuwa ia ka por ba la buh,” la ong u Myntri.
U Myntri u la iaroh ia ki jingpyrshang ka Sorkar Meghalaya ha ka projek ba ka la sdang ban khyllie im biang ia ki tyllong um bad ka jingpyndonkam ia ka um bad ki jingjop jong ka Meghalaya ha kine ki kam kin long ka nuksa ia kiwei kiwei ki jylla.
Ula pynkut da kaba ong, ba u ngeit skhem ba ka Meghalaya kan long ka nongialam lynti ia kiwei kiwei ki jylla ka thain shatei lammihngi lyngba ki projek bapher bapher ha ki kam bapher bapher bad ba kan lah ban pynurlong ia ka jingthmu jong u Myntri Rangbahduh ba kane ka thain kan long ka kor jong ka roi ka par jong ka ri.
