Shillong, Naiwieng 03 : U Chief Executive Member (CEM) ka KHADC Bah Titosstarwell Chyne ula pyntip ba ki Regional Committee iapynbeit kajia pud, shen kin sa aiti ia ka thup kyrteng jong ki shnong kiba hap ha ki hynriew tylli ki jaka bym pat dep pynbeit khnang ba ka Council kan ioh pynlong ia ka jingiasyllok bad ki kynhun bapher bapher nalor ki Khlieh Synshar Shnong.
U CEM ula pyntip ia kane haba jubab ia ka jingkylli ha ka kynta kylli jingkylli jong ka Dorbar Tlang ka Council ba long hynne ka sngi palei.
Ula ong ba ka Regional Committee ka West Khasi Hills kala dep ban pynlong ia ka jingialang dang shen bad ka Regional Committee ka Ri-Bhoi ka dang shu dep pynlong myn ha ka sngi Balang.
Ha kane ka jingialang la rai ba hadien ba ki Regional Committee kila aiti ia ka thup kyrteng jong ki Shnong, ka Boundary Committee jong ka Council kan sa pynlong ia ka jingiasyllok bad ki Khlieh Synshar Shnong lem bad ki Kynhun bapher bapher khnang ban pynthikna ia kine ki jaka bad pynkhlain ia ka jingkam jong ka Jylla ia kine ki jaka.
Ia kane ka jingkylli la wanrah da u MDC ka Congress na Mawhati Bah Charles Marngar.
