Agartala, Lber 03: U nongialam ba la rim ka seng BJP u Manik Saha u la pynkhreh ban shim smai kum u Myntri Rangbah (CM) ka Tripura ha ka kylla kaba ar.
Katkum ki tyllong khubor na ka BJP, la ong ba ka jingpyntian smai ia u kan long ha ka 8 tarik mynta u bnai.
U Saha u la phah ia ka shithi iehnoh kam kum u CM ka Tripura sha u Lat ka jylla u SN Arya hapoh Raj Bhavan ha Agartala mynta ka sngi Thohdieng.
Haba kren sha ki lad pathai khubor, u Manik Saha u la ong, “Nga la phah ia ka shithi iehnoh kam sha u Lat bad na ka liang ka jong u, u la kyntu ia nga ba ngan dang bteng kum u CM tad haduh ban da thaw ia ka sorkar thymmai.Kane ka jingialang pyntian smai ka lah ban long ha ka 8 tarik mynta u bnai.”
Ka BJP ka la ioh bat biang ha ka bor ha ka kylla kaba ar ha Tripura hadien ba ka la ioh ia ka jingbun paid ha kane ka ilekshon assembly kaba dang shu dep shen.
Ha kawei ka bynta na ka liang ki nongkyrshan ka BJP ki la pynpaw ia ka jingkmen bad sdang ruh ban ialehkmen halor ka jingjop jong ka jylla ha ka kylla kaba ar.
Ka kynhun synrop BJP-IPFT ka la wanphai biang ha ka bor ha Tripura da kaba jop 33 seat ha ka dorbar assembly kaba don 60 ngut ki dkhot.
“Ha kine ki san snem kiba la leit noh shibun bah ki kam pynroi la lah ban pyndep ha Tripura.Ka jylla kala shah iehnoh bein lah bun phewtylli ki snem ha ka jingsynshar jong ka left.Ngi sngewkmen ba ka jylla jong ngi kan kiew shaphrang hapoh ka jingsynshar jong ka BJP,” ong uwei na ki nongkyrshan ka BJP.
Kumjuh ka party TIPRA Motha kaba la lamkhmat da u khun syiem ka Tripura u Pradyot Debbarma ka la ioh 13 seat ha ka sien iakhun kaba nyngkong ha kan ka ilekshon assembly, katba ka kynhun synrop jong ka Left bad Congress ki la ioh 14 seat.Ha kawei pat ka liang ka seng TMC kam shym la jop wat tang kawei ka seat ha kane ka ilekshon assembly ha Tripura.
Ia kane ka ilekshon ha Tripura la pynlog ha ka 16 tarik u Rymphang ba la dep bad ka jingniew ia ki vote ka la long ha ka 2 tarik mynta u bnai.
