Shillong, Naitung 25 : U Myntri kam Pohiing ka Ri Amit Shah, ula kular ban thaw da ka Committee ka ban khmih bad shimkhia ia ki mat jingdawa jong ki 10 tylli ki Autonomous District Council (ADC) ka thain Shatei Lam Mihngi.
U Amit Shah ula ai ia kane ka jingkular ha ka jingiakynduh ia ka kynhun ki nongmihkhmat jong ki 10 tylli ki ADC, kiba la iakynduh ia u hynne ka sngi Palei ha New Delhi.
U Amit Shah ula pyntip ruh ba kane ka Committee kan sa shong bishar lut ia baroh ki mat jingdawa jong ki ADC bad ban pyndep ia kane ka kam hapoh ka 25 tarik u Nailar, 2024.
Ia kane la pyntip da u Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem hadien ka jingiakynduh ia u Amit Shah.
“Ka jingialang bad u Amit Shah kala neh kumba shiteng kynta bad ngi la pynsngew ia ki jingai jingmut jong ngi haba iadei bad ka jingpynkylla thymmai ia ki kyndon ka Sixth Schedule” pyntip u CEM.
U Bah Pyniaid ula iathuh “Ngi la pynsngew iala ki jong ki jong ki jingeh bad ki jingai jingmut (na baroh 10 ADC). U Myntri kam Pohiing ula sngap bha ia ki jingpynsngew jong ngi bad kular ba un thung da ka Committee ka ban sa shong bishar bad aiti ia ka kaiphod hapoh ka shibnai kata hapoh ka 25 tarik Nailar”.
Ula pyntip ba ia kane ka Committee yn khlieh da u Myntri Khynnah ki kam Pohiing kum u Chairman.
“Ngi ki 10 ADC ngi pynpaw ka jingsngewnguh ia u Myntri kam Pohiing uba la sngap bad shimkhia ia kane ka kam jong ngi, kaba iadei bad ka jingpynkylla thymmai ia ka Sixth Schedule” ula ong.
U CEM u pyntip ba ki CEM jong ki 10 ADC kila shim ruh ia ka rai ruh ba kin sa iakynduh biang ha Shillong ha ka 10 tarik u Nailar.
Na ka liang ka KHADC kala aiti ruh la ka jong ka dorkhas sha u Myntri kam Pohiing ka Ri haba iadei bad ki jingai jingmut halor ka jingpynkylla thymmai ia ki kyndon ka Sixth Schedule.
Kine ki jingai jingmut ki kynthup ia ka jingdawa ban pynbun ia ki shuki MDC sha ka 37 tylli ha kaba 6 tylli kin dei kiba da jied da u paidbah bad 2 tylli ki ban shu sieh ia kaba kawei dei ban ai bhah sha ki kynthei.
Nalor kane, la ai jingmut ruh ban mait noh ia ka kyntien Unrepresented Tribe bad ban pynlong ia ka elekshon MDC kat kum ka Rule elekshon jong ka Sixth Schedule ym da ka Election Commission ka Ri India.
 ka thain Shatei Lam Mihngi.){kind=link}