Shillong, Jymmang 29 : Ka Myntri ka tnad Ka Koit ka Khiah Kong Ampareen Lyngdoh kala pyntip ba ka Sorkar Jylla kala pynkhreh nadong hadong ban iakhun ia kino kino ki khep ba kyrkieh lada jia ba wan lynshop u khniang thymmai (new variant) jong ka khlam Covid-19 haba kyntu ruh ia ki nongshongshnong ba kin bud ryntih ia ki kyndon bala buh ban tem ia ka jingsaphriang.
Haba kren sha ki lad pathai khubor ha ka sngi Palei, ka kong Ampareen kala iathuh ba la mih u khniang thymmai jong ka Covid, uba lane ula mih ha ki katto katne ki jaka jong ka pyrthei bad namar kane, ka Sorkar kala pynlong ia ki jingialang bishar kam ban khmih ia ki jingpynkhreh jong ka Jylla.
“Lada phi kylli la ngi la pynkhreh ne em, nga ong hooid hynrei nga ban jur ia ka jingshisha ba ngim dei ban khih khuslai. Ka Covid mynta ka long kum ka flu ha ki 19 spah snem mynshuwa ha ka por ba ym pat don dawai satia ban iakhun hynrei mynta bad u Covid, ka Sorkar Jylla kala pynkhreh bad kala peitngor bha ia ka jinglong jingman” kala bynrap.
Haba ban jur ia ka jingkongsan ka jingiashimbynta lang u paidbah ban tehlakam ia ka jingsaphriang u Covid ha Jylla, ka Myntri kala ong “Nyngkong, lada don kiba shu sngap ia ka jingjyrhoh, jingshitmet lane kino kino ki dak kiba syriem ia ki dak jingpang covid sngewbha ban leit test mardor ialade. Kaba ar, lada ka test ka pynthikna, sngewbha bud ia baroh ki kyndon Covid. Phi dei ban kynmaw ba ngi iatip lut ia ki SoP jong ka Covid”.
Nalor kane, ka Myntri kala pyntip ba ka Sorkar India kala kular ba kan sa wanrah ia ki lad treikam kiba paka ban iakhun ia une u khniang thymmai jong ka Covid-19.
Ka Myntri kala pyntip ruh ba ka Meghalaya kala don pahuh ia ka oxygen, ki jingthiah ICU, ki dawai bala buh lypa bad ong “Kane ka dei kaba ka Sorkar Meghalaya kala shong bishar bad kala pynkhreh”.
 jong ka khlam Covid-19 haba kyntu ruh ia ki nongshongshnong ba kin bud ryntih ia ki kyndon bala buh ban tem ia ka jingsaphriang.){kind=link}