Shillong, Jymmang 28: Ki 3 tylli ki Medical College ka Jylla, kawei kaba la treikam lypa ka USTM ba la pyniaid daka PIMC bad 2 thylli- ka Shillong Medical College bad ka Tura Medical College kin sa pynkut noh ïa ka jingduna doktor hapoh ka Jylla hapoh u snem 2033.
Haba pynpaw ïa ka jingïohi jngai jong ka jylla ban weng ïa ka jingduna jong ki nongtrei haka koit ka khiah, u Myntri Rangbah ka Jylla Meghalaya u Conrad K Sangma u la pynbna ba ka Shillong Medical College ka la pynkhreh ban treikam noh naduh une u snem katba ka Tura Medical College & Hospital (TMCH) kan dang sdang treikam noh ha u snem 2026-2027.
Kine ki jaka pule doctor ha ryngkat bad ka PIMC ba pyniaid da ka USTM, kin long kongsan ha ka ban noh synniang sha ka bor trei jong ka koit ka khiah jong ka Jylla.
Haba kren ha ka prokram ha Williamnagar, u Myntri Rangbah u niew ia kine ki Medical College kum ka “jingkyrkhu” na ka bynta ka Jylla Meghalaya bad u la pynpaw ba “ki lai tylli ki Medical College kynthup ïa ka PIMC ba la pynïaid da ka USTM, kin pynmih ïa ki doktor ha u snem 2032, bad ki college jong ka Sorkar kin pynmih Doctor ha u snem 2033 ban jop ïa ka jingduna doktor hapoh ka Jylla.
Haba kren shaphang ka rukom treikam jong ka TMCH, u Myntri Rangbah ka Jylla u la pynshai ba kan treikam kum ka jingïatreilang (Joint Venture) bad ki nongpynïaid shimet.
U Conrad u la batai ba katba ki riewshimet kin bah kitkhlieh ban thung ïa ki doktor ba tbit, ban siew ïa ka tulop jong ki, bad ban pynïaid ïa ki kam ba man la ka sngi jong ka college, ka Sorkar kan bat beit ïa ka bor ban khmih halor ki jingdon jingem jong ki Medical College bad iaki jingtei.
Kaba kham kongsan ka long ba ïa kiba bun ki seat yn ai hapoh ka bhah jong ka Jylla, da kaba siew katkum ki kyndon jong ka Sorkar.
Kumjuh ruh ka jinglut ha ka jingsumar haki hospital yn bud ia ki dor ba la buh da ka sorkar.
Ka jingpyniaid daki riewshimet kan long tang ban shim ia ka bai pule na ki samla pule kiba la pynrung kyrteng hapoh ka ‘Management Quota’ bad ban pyndonkam iaka pisa na ka bynta ka bha ka miat jong ka college.
Haba iadei bad ka jingdonkam jong ka joint venture, u Myntri Rangbah u la ong “Kane ka mih namar ka jingduna jong ka Jylla ïa ki riew shemphang kiba tbit ban hikai ha ki Medical College”.
“Ka Shillong Medical College ka lah ban pyniaid kumba 85 percent ki riew shemphang na ki doktor Sorkar kiba la don lypa, katba na ka bynta ka Tura Medical College, kan long kaba eh shibun ban ioh ia ki riew shemphang” u la pynpaw haba pynshai ia ki daw jong ka jingdonkam ia ka joint venture ban pynlong ia ka kolej ban treikam kham kloi bad kumjuh ruh ban pynurlong ia ka thong kaba kham heh jong ka jinglah pynbiang ia ki doktor ha Jylla.
