Shillong, Iaiong 11: Ka Meghalaya ka la lah ban pyni iala ka sap haka ‘Online National Kettlebell Sport Championship’ kaba la long hapoh ka Jylla Goa daka khur 13 tylli ki takma.
Ki 13 tylli ki takma baka Meghalaya ka ioh khur ki kynthup 9 tylli ki takma ksiar, 3 tylli ki takma rupa bad 1 tylli ki takma rnong.
Ka Meghalaya ka la wan ha ka kyrdan kaba ar ha ka jingkheiñ kyllum ba ioh takma hadien ka Jylla Maharashtra kaba la wan haka kyrdan ba nyngkong katba ka Jylla Uttarakhand ka wan ha ka kyrdan kaba lai.
Ka jingjop ka Meghalaya ha ka kyrdan National Level ka la pynpaw biang sa shisien ïa ka jingroi ha ka jingïalehkai kettlebell.
Ha ka ‘One Arm 10-Minute Clean and Jerk’ ki nongïalehkai ka Meghalaya ki la wanrah bun tylli ki takma ksiar kynthup u Brian Wallang, Manish Sohbar, Stevenson Naduh, Ian Kupar, bad ka Enifer Nongkynrih.
Ka Cathy Marbaniang ka ioh khur takma rnong, ka Kathy Decruse bad ka Persara Thangkhiew bad ka Kynjaimon Pdah ki la ioh mar kawei ki takma rupa.
Ha kiwei pat ki jingïakhun, ka Sonia Langstieh ka la ïoh ban khur ïa ka takma ksiar ha ka jingïakob kaba 12 Minute Military Snatch, katba u Gagandeep Singh u la khur ïa ka takma ksiar ha ka 10 Minute Snatch.
U coach ka Jylla unSandeep Sharma u la khur ar tylli ki takma ksiar ha ka jingïakob ’10 minit 24kg Snatch’ bad ’30 minit 24kg Snatch’.
Kane ka la pynlong ïa u ban ïoh rung sha ka lympung ïalehkai ‘Kettlebell World Championship’, kaban sa long ha Busto Arsizio, Italy, naduh ka 5 haduh 8 tarik Jylliew.
Lah ban kdew ba u Coach Sandeep Sharma mynshwa u la jop ïa ka takma rnong na ka bynta ka India ha ka lympung ïalehkai ‘Kettlebell World Championship’ ha Hungary ha u snem 2023 bad u la leh biang ïa kane ka jingjop ha Poland ha u snem 2024.
