Nongpoh, K’lyngkot 13 : Ki Longkmie ba da ki phew ngut, kila iatur paidbah hynne ka sngi Nyngkong, sha ka Ophis u Deputy Commissioner ka Ri-Bhoi District, ban pan jingshai halor ka jingbym ioh ration card wat hadien ka jinglum khana samari jong u snem 2011.
Kine ki Longkmie bala lamkhmat da ka Kong Iohilut Lyngdoh, kila dawa ia ka jingpynshai na u khliehduh ka District halor ki nongrim bad ki daw ba pynlong ia kiba bun ki longiing ka thain ban nym ioh ration card bad khaw ration kumba ioh lang kiwei kiwei ki longiing baduk.
Haba kren sha ki lad pathai khubor, ka kong Iohilut kala pynpaw ia ka jingsngewkhia ba na ka liang ka Tnad Supply ka District, kam shym la kynthup lang ia ki Longiing ka thain tad haduh une u snem ba mynta, ba kin ioh ia ka bhah marbam bala mang da ka Sorkar Pdeng na ka bynta kiba duk.
“Ngi ki longiing kiba duk ngi dap da ka jingsngew lyngngoh ba naduh ba lum ia ka khana samari ha u snem 2011, da ki spah ngut ki longkmie kim shem la ioh shuh ia ka ration card kumba ki dei hok” kala ong haba kam “Katba ki longiing kiba kham bit kham biang kila ioh ia ka bhah marbam ne khaw ration”.
Haba pynshai ia kane, u Deputy Commissioner Abhilash Baranwal ula kular ba un sa shimkhia ban buddien ia kane ka kam bad ki bor kiba dei khmih.
Ula ong, ki longkmie kila wan ujor ba kim ioh ia ka ration card watla kila dep ban pynrung kyrteng bad bynrao “Ka Ophis jong nga kam lah ban leh eiei halor kane ka bynta namar ka dei ka sorkar pdeng kaba khmih ia kane ka kam”.
Hynrei ula kular pat ba un sa khmih bad sa shimkhia ban iakren bad ki bor kiba halor.
