Agartala, K’lyngkot 12 :Ka kynhun ba pura ka Election Commission kaba kynthup ia u chief election commissioner u Rajiv Kumar bad ki election commissioner kiba kynthup ia u Anup Chandra Pandey bad u Arun Goel ki la wanpoi ha ka nongbah hynne ka sngi bad pynlong ia ka jingialang bad baroh ki nongialam bad ki nongmihkhmat jong baroh ki party sain hima.Kine ki heh ka ECI ki la pynthikna ruh sha ki nongialam jong baroh ki party ba ka Commission kan pynthikna ha kaba iadei bad ka jingiaid beit ha ka jingpynlong ia ka ilekshon da ka iingdorbar assembly.
Haba iashim bynta ha ka jingialang bad ki lad pathai khubor ha Tripura mynta ka sngi, u Chief Election Commissioner u Rajiv Kumar ula pynpaw ba kane ka tnat ka la shim ia baroh ki sienjam ban pynthikna ba ka jingpynlong ia ka ilekshon kan long kaba khuid ba suba bad kaba iaid beit iaid ryntih.
Ia ki card jong ki nongthep vote ha ka sien kaba nyngkong la lah ban pynioh sha baroh, bad ka la don ruh ka jingpynkhreh kaba kyrpang na ka bynta ki riewtymmen.Katba ki briew kiba don jingduna ha ki dkhot met ki lah ban pyndep iala ki hok ban jied lyngba ka Saksham app nalor kiwei pat ki jingpynkhreh kiba kyrpang.
Nalor kata la shim ruh ia ki sienjam ha kaba iadei bad ka jingpyrkhing ia ka jingpahara bad ban khmih halor ka jingshngain jong ki kyrtong kiba iakhun ha ka ilekshon.
Ha kane ka kynti kaba mynta ki la don 28.13 lak ngut ki nongthep vote kiba la dep ban rejistar ialade hapoh Tripura bad 65,000 ngut ki dei ki nongthep vote ha ka sien kaba nyngkong kiba la dep ban rejistar ha ka jylla.
Ha katei ka jingialang bad ka Commission kaba la long hapoh ka conference room jong ka guest house ka sorkar jylla la mihkhmat ia ka PI(M) da u secretary jong ka party u Jiten Chowdhury bad u Sadar subdivisional committee secretary uba dei ruh u MLA barim u Ratan Das.Ia ka Seng Congress la mihkhmat da u PCC president u Birajit Sinha bad u MLA u Sudip Roybarman, katba ka sorkar synshar BJP la mihkhmat da u Dr. Ashok Sinha bad u nongkhmih bniah napoh central u Dr. Mahesh Sharma, katba ia ka Trinamool Congress la mihkhmat da ki nongialam ka jylla kumjuh na ka bynta ka party Tipra Motha.
Baroh ki nongialam, khamtam u MLA ka Congress u Sudip Roybarman, u state secretary ka CPI(M) u Jiten Chowdhury nalor ki nongialam ka “Tipra Motha,” ki la pynpaw ba baroh ki jingpynlong ia ki ilekshon ha ka jylla, kata naduh ka ilekshon Loksabha, Panchayat, Civil Polls, bad wat i ilekshon shiteng samoi kim shym la long kiba la pynkhreh ha ka rukom kaba biang.Nalor kane kine ki party ki buh ruh ka jingkyrpad ha kaba iadei bad ka jingbinag jong ki EVM, ka jingiathep vote, ka jingniew ia ki vote bad ka jingpynbiang ia ka jingpahara na ka bynta kane ka ilekshon ka ban wan.
