Shillong, Jymmang 27: Ka Jaiñtia National Council (JNC) 7 Shnong Circle ka pynpaw ia ka jingsngew syier halor ki katto katne ki post elektrik kiba la rim bad ki bym i skhem shuh ha ka shnong Rangad, da kaba ong ba ki buh jingma ïa ki nongleit nongwan bad ïa kawei ka ïing kaba don hajan.
Ka JNC haka jingialam u secretary Bah Mehi Rymbai ka la leit ban iakynduh ia u Sub-Divisional Officer ka MePDCL ban dawa ban bujli noh kyrkieh ia ki post elektrik.
“Ngi la dawa na u SDO ka MePDCL ban bujli noh khlem da pynslem shuh ïa ki post elektrik kiba la jan dkut ha ka shnong Rangad,” ong u Bah Mehi.
Ka JNC ka la ong ba ki post elektrik ki la nang sarang katba nang mih ki sngi bad mynta ki buh ha ka jingma, ha kaba uwei post elektrik u don tang katto katne meter na kawei ka iing briew.
“Lada ym bujli mardor ïa kum kine ki post elektrik, kin buh jingma kaba khraw ïa ka jingim jong ki briew kiba ïaid lynti, khamtam ïa ka longïing kaba don marjan” ula ong.
Ki nongshong shnong ki ieng ba ki post elektrik ki lah ban kyllon ha ka por lyiur ne haba jur ka lyer kaba lah ban pynhap sha madan ïa ki wire kiba im bad lah ban wanrah ïa ka jingshah bat bording ne ka jingjulor jong ki mar ki mata.
U SDO u la pynthikna ia ka JNC ba ka tnat kan shim ia kane ka kam kum ka mat kaba kongsan.
“U SDO u la kular ban shimkhia bha ïa kane ka kam bad u la ong ba un leh katkum ka jingdawa jong ka JNC bad ha ki sngi ban wan un sa phah mardor iaki nongtrei ban pynbha iaki post elektrik bad ki wire naka bynta ka jingshngaiñ jong ki paidbah” ong ka JNC.
Ka JNC 7 Shnong Circle ka la ong ba kan buddien ia kane ka jinglong jingman bad ban buddien bad ka MePDCL ban pynthikna ba ki jingbujli iaki Post ilektrik bad wire kin long khlem da pynslem.
 7 Shnong Circle ka pynpaw ia ka jingsngew syier halor ki katto katne ki post elektrik kiba la rim bad ki bym i skhem shuh ha ka shnong Rangad, da kaba ong ba ki buh jingma ïa ki nongleit nongwan bad ïa kawei ka ïing kaba don hajan.){kind=link}