Shillong Nailar 20: Ka Sorkar Meghalaya kala pynbna ia ka jingkynshew tyngka kaba heh ha ka kam jngohkai, kaba la wan lyngba ka Ministry of Development of North Eastern Region (DONER) da ka jingpyllait ia ka song pisa ba T.220 Klur na ka bynta ki projek ban pynroi ia ka kam jngohkai hapoh Sohra.
“Ha ka sien kaba nyngkong eh ka DoNER Ministry kala pyllait ia ka Investment Plans na ka bynta ka kam jngohkai. Baroh shi katta, kadei beit ka Ministry of Tourism bad ki kynhun bei tyngka kum ka ADB, NDB hynrei mynta ka snem u Myntri ka Sorkar Pdeng uba khmih ia ka DoNER u Jyotiraditya M Scindia ula pyllait ia ka song T.220 Klur na ka bynta ki projek kam jngohkai ha Sohra,” iathuh u Myntri kam jngohkai ka jylla Bah Paul Lyngdoh haba iakren bad ki nongthoh khubor ha ka sngi Balang.
Ula pyntip ba u Scindia u lah ban wan iashimbynta ha ka Cherry Blossom Festival kaban long mynta u snem bad ban buh ia u mawnongrim na ka bynta ki katto katne tylli ki projek ha ki thain Sohra kaban kot haduh T.220 Klur.
U Bah Lyngdoh ula ong, ba kitei ki projek kin phaikhmat sha ka kam jngohkai kaba iai sah jingkynmaw bad kaban plie lad ia ki nongjngohkai ban pynlut ia ka por ban tip shaphang ka rukom im ha ki shnong nongkyndong bad ia ka kolshor tynrai.
U Myntri Sorkar ula pynbna ruh ba ka sorkar kala shim ia ka rai ban tei ia ka ‘Heritage Resort’ ha Sericulture Farm ha Lawsohtun.
“Dang ha kine ki khyndiat bnai, nga la leit ban jurip ia ka Textiles Complex kaba don ha Lawsohtun kaban don hajan bad ka Shillong Ropeway project bad ha ka jingdon lang ki ophisar jong ka Textiles bad Tourism, ngi mynta ngi lah iaid shakhmat ban ioh thaw ia ka Heritage Resort kaban long kaba rim tam hapoh ka thain shatei lam mihngi” ula ong.
Ia kane ka Resort yn tei ha ka Sericulture Farm kaba la tei naduh u snem 1925 da ki phareng na ri Bilat bad mynta kadei ka ‘Heritage Project’.
“Ban kyntiew shuh shuh ia ka jingioh mad ki nongwankai sha Meghalaya ia kaei kaba kin sah jingkynmaw, ngi ngin khleh lang ia ki kam kiba iadei na ka tnad Textiles bad na ka Tourism khnang ba yn lah ban pynbiang ia ka jingwan tuid ki nongjngohkai sha ka thain, shisien ba la tei pyndep ia ka Shillong Ropeway Project ia kaba la khmih lynti ban pyndep ha ki ar snem kiban wan” la ong u Bah Lyngdoh.
 da ka jingpyllait ia ka song pisa ba T.220 Klur na ka bynta ki projek ban pynroi ia ka kam jngohkai hapoh Sohra.){kind=link}